Vâ pro tơtro tơdroăng cheăng kố, Vi ƀan hnê ngăn kong pơlê Dak Lak hôp séa ngăn tơdroăng ƀă tah lôi pá puât mâu tơdroăng tơkêa bro xua Khu pơkuâ tơdroăng tơkêa bro mơ’no liăn cheăng mơjiâng tơmeăm khoăng kuăn pơlê xúa ƀă kơmăi kơmok kong pơlê pơkuâ mơ’no liăn cheăng. Khu kố châ pơcháu hên tơdroăng tơkêa bro laga nếo bu mơ’no liăn cheăng châ 10% pơkâ pêi. Hơnăm 2026 Khu châ pơcháu pơkuâ 33 tơdroăng tơkêa bro, ƀă tâi tâng pơkâ pêi kơxô̆ liăn lối 917 rơtal liăn.

Laga, tơdroăng pêi pro ƀă mơ’no liăn cheăng ối hrá. Hên tơdroăng tơkêa bro hngêi trăng kơpong ôm hyô long têa Lăk, troăng N6, troăng Nguyễn Đình Chiểu tơdjêp xŏn, hngêi trăng troăng klông Kơpong hngêi kơmăi kơmok Hòa Phú... pơrá trâm pá tơdroăng chêl thiê̆n, tá hâi tơdâng tơ’mô ƀă kuăn pơlê. Mâu tơdroăng tơkêa bro ki ê trâm pá pơhlêh troăng hơlâ mơ’no liăn cheăng, ôh tá ai kơxô̆ liăn lơ tá hâi mơ’no liăn.

A roh hôp, hên mâu kăn tơkŭm tơpui tối ‘na xing xoăng tơdroăng tơkêa bro ƀă tơpui pêi pro tâi rêm khu ki trâm pá, teăng ki pêi pro utâi utá. Ƀă mâu tơdroăng tơkêa bro ki thâ mơ’no liăn cheăng, pôa Đỗ Hữu Huy, Kăn hnê ngăn Vi ƀan kong pơlê Dak Lak pơkâ pêi pro ƀă kơtăng khât tung mơ’no liăn cheăng. Tơdroăng ki kal, thế pơtroh kơxô̆ liăn rĕng vâ tơniăn tơdroăng mơ’no liăn.