Long têa Ia Lâm, cheăm Gào cho môi tung tíu ki tôh têa ki kal ăm kuăn pơlê, nôkố hiăng xoê. Vâ tôh ăm mâu hdrê pêt dế rế hía rế vâ hlâ răng xua kong tôu mơdrăng, hên rơpŏng kuăn pơlê vâi hiăng mung kơmăi kui, kơmăi chiâ trâu vâ tăng têa mŏng. Laga, têa ki iâ kố xuân hiăng tâi. Ngoh Nguyễn Phát, a thôn O Grang, cheăm Gào, tối tung tơdroăng ki khéa hơ’nêng:

“Nôkố tơkôm ai kơto têa ki lâi mê tôh kơto têa ki mê tôh châ 5,6 xiâm xuân hôm, tơbriât dêi rơpó mê tôh ăm hdrê loăng pêt ki lâi xuân mơnê. Têa hơnăm kố rế hía rế xoê rế rĕng”.

Ôh ti xê to long têa Ia Lâm, tá 5 to long, rơchoâ têa a cheăm Gào têa pơrá hiăng xoê tâi. Pôa Bùi Văn Thỏa rơtế ƀă hên rơpŏng kuăn pơlê ki ê dế hrik têa sap ing long Ku Tong ăm ‘nâi, vâi krâ kuăn pơlê dế hrik têa ki iâ má mơ’nui kố. Tiô pôa Thỏa, tâng kong tôu pơtối ối, bu tung pơla iâ hâi nếo, long têa ki kố gá kô xoê tâi tâng:

“Vâi krâ kuăn pơlê nôkố vâi tôu tuăn khât, xua ôh tá ai têa tôh, xơpá. Ai mâu rơpŏng ki ‘nâ akố vâi pong têa klôh la ôh tá ai têa”.

Tơdroăng ki ôh tá ai têa tôh ăm hdrê loăng pêt a Gia Lai dế trâm tung lâp lu rêm hâi malối cho a kơpong peăng mâ hâi Lâ dêi kong pơlê. Pôa Rơ Mah Hêng, Phŏ kăn hnê ngăn Vi ƀan cheăm Ia Tôr ăm ‘nâi, ki hdrối tâ, cheăm tơkŭm hnê tối, mơhnhôk kuăn pơlê xúa mâu troăng hơlâ tôh têa kơdĭng vâ pơtối châ tôh ăm mâu hdrê loăng pêt:

“Kong tôu môi tiah kố gá kô ôh tá ai têa tôh, xua nôkố bu ai to têa klôh ƀă têa plông, ôh tá ai têa long rơchoâ. Ngin pơtối hnê tối mơhnhôk kuăn pơlê tôh têa kơdĭng, vâ bê têa tôh ăm hdrê pêt”.

Ki khât gá ăm hlo, tơdroăng ki ôh tá ai têa tôh ăm mâu hdrê loăng pêt a Gia Lai hmâ trâm rêm rôh mơ’nui rơnó tôu, malối cho a kơpong peăng mâ hâi Lâ dêi kong pơlê. Mot tung hneăng nếo ‘mot tơkŭm, kăn pơkuâ ngăn Đảng Gia Lai hiăng pơkâ thế pơxiâm pêi túa pơkê pêi mơjiâng pro rơchoâ long ƀă tâi tâng kơlo liăn pro troh 17 rơpâu rơtal, tung pơla hơnăm 2025 – 2030. Ƀă ki ahdrối, mâu cheăm athế xúa tâi mâu tíu ki ai têa. Pôa Nguyễn Văn Phương, Ƀơrô cheăng kâ cheăm Gào ăm ‘nâi:

“Cheăm hiăng pâ thế kong pơlê tŏng gum liăn vâ ‘mêng pro mâu long, rơchoâ têa a cheăm. Tiah mê, pin kô pêi tơdroăng cheăng kui tah mâu trâp tơnêi a hno têa, long rơchoâ vâ ai têa tôh ăm mâu ƀăng tơnêi pêt hdrê loăng ton hơnăm tung kơpong. ‘Na ki ton xŏn cho athế lăm ngăn a mâu têa plông vâ pro mâ rơchoâ têa ki kŭn vâ ăm ai têa mŏng xuân môi tiah tôh ăm mâu kơpong tíu ki kŭn a cheăm”.