Rơnó tô mơdrăng hơnăm 2025 – 2026 pơla kố nah, tơdroăng ti tăng, tơkŭm kơxêng kiâ mô đô̆i Việt Nam pleăng hnoăng cheăng veăng tơplâ xâ ƀă mâu ngế ki rơkê Việt Nam hlâ a kong têa Kul ing mâu rơxông tơplâ xâ châ péa pâ tơrŭm pơkuâ, hnê mơhno pêi pro tŭm tiô Mơ-éa chôu vế kĭ rêm hơnăm. Tơdroăng tơrŭm cheăng, tơpui tơno, tơpui pêi pro mâu tơdroăng ki ai tơdjâk châ tơkŭm pêi pro krá.

Ƀă tơdroăng mơ-eăm đi đo dêi Đô̆i K51 (Khu xiâm pơkuâ lêng kong pơlê Dak Lak) ƀă tơdroăng tơmâng tŏng gum dêi khu râ kăn pơkuâ mâu kơ koan cheăng kong pơlê Mondulkiri mơdêk tơdroăng pơtâng tối, tơbleăng tơdroăng, pơtroh mơngế pêi cheăng tŏng gum a mâu kong pơlê, troh nôkố hiăng tơkŭm châ 22 kơxêng kiâ mô đô̆i Việt Nam (tá hâi mơnhên inâi).

Péa Khu pơkuâ hiăng tơpui tơno, môi tuăn tơdroăng tơkŭm po Leh xối mâu mơhúa, pơcháu ƀă djâ kơxêng kiâ mô đô̆ ki hlâ tung tơplâ xâ nah vêh kong pơlê Dak Lak, tiô tối hdrối po a hâi lơ 27/5, tiô tro tơdroăng po ƀă khôi túa lĕm tro dêi Kul. Péa pâ xuân môi tuăn mâu tơdroăng xiâm tơdjâk troh tơdroăng ti tăng, tơkŭm kơxêng kiâ mô đô̆i tung la ngiâ.