VOV4.Sêdang - Pôa Nguyễn Xuân Phúc, Kăn xiâm hnê ngăn tơnêi têa hiăng ai ƀai xông tơpui a roh hôp tơpui tơno tơdjuôm Khu râ kăn xiâm Hneăng hôp 76 Grup kring vế Khu lâp kong têa ƀă dó inâi: ‘’Rơtế loi tơngah ƀă mơ-eăm xêh – Tơmiât la ngiâ xông tơtêk klêi kơ’nâi COVID-19, vêh mơjiâng krá tơniăn, gak kring plâi tơnêi, mơnhông hnoăng kuăn mơngế ƀă vêh pơ’lêh khu lâp kong têa’’.

Tung ƀai xông tơpui dêi tơná, Kăn xiâm hnê ngăn tơnêi têa hiăng tối mâu tơdroăng ki hía ôh tá chiâng ai xêo drêng pơreăng kân COVID-19 tâ tú, mơnhên pơreăng kân cho vâ tơbleăng thâ ‘na ki ‘nhê râ ó dêi mâu pơloăng mơnúa kring vế, hbrâ ví pơreăng tiah hmâ lơ tơdroăng kong prâi hơ’lêh tâng ôh tá châ tơmâng pêi pro, rĕng mơdât, mơdât ing hơhngế. Ƀă hnoăng dêi Khu lâp kong têa, Kăn xiâm hnê ngăn tơnêi têa pói vâ khu kố pơtối mơnhên hnoăng tíu xiâm tung tơdroăng cheăng hên troăng, dế pơkuâ châ tơƀrê mâu tơdroăng mơ-eăm tơdjuôm hbrâ mơdât ƀă mâu pơloăng mơnúa lâp plâi tơnêi rế hía rế thâ mê ôh tá xê krê môi kong têa ki lâi kô chiâng pêi pro xêh môi ngế.

Hnoăng cheăng thâ má môi nôkố cho mơdât pơreăng kân COVID-19 tung lâp plâi tơnêi, ki má lối cho kơjo xing xoăng  ăm vaccine ăm kuăn pơlê mâu kong têa ki ai kơxô̆ mơngế pâk ối iâ, pro tơ’lêi hlâu vâ mâu kong têa dế mơnhông mơdêk tơrŭm cheăng ƀă veăng tung tơdroăng xing xoăng ăm vaccine.

A Sa Ly tơplôu ƀă tơbleăng