VOV4.Xơ Đăng - Pêi pro hnê mơhno dêi Chin phuh xuân môi tiah Vi ƀan hnê ngăn kong pơlê Dak Lak “Vâ hmâ tơniăn, rơkê, hbrâ mơdât tơƀrê pơreăng COVID-19”, Vi ƀan hnê ngăn pơlê kong kơdrâm Ƀuôn Ma Thuột pơkâ hlá mơ-éa xúa mâu troăng hơlâ hbrâ mơdât pơreăng nếo, pơxiâm sap ing 6 chôu kơxo hâi lơ 30/11 tá troh drêng ai tơbleăng nếo.

Ƀuôn Ma Thuột (Dak Lak) ăm mâu tíu poê xâk, tíu ki mơđah phim vêh pêi cheăng

Tiah mê, châ phêp tơkŭm po tung hngêi, a gong la pôi tá hluâ 30 ngế a môi tíu; tơkŭm pá xôp 50 ngế ƀă tơdroăng ki ai lối 90% kơxô̆ ngế hiăng pâk tŭm 2 trum vaccine lơ hiăng pêi ing pơreăng COVID-19 ôh tá luâ 6 khế; mâu ngế ki veăng mê athế pêi pro kơtăng tiô pơkâ 5K dêi Khu xiâm ngăn pơkeăng ƀă khăm pơlât ƀă kơtăn hngế 2 met.

Ƀă tơdroăng ki ôh tá kal tá hâi châ ăm phêp vêh pêi cheăng; krê ƀă mâu tíu poê xâk, tíu mơđah phim châ vêh mơđah, poê xâk nếo la athế pêi pro kơtăng mâu troăng hơlâ hbrâ mơdât pơreăng. Mâu ngế ki poê xâk athế pâk iâ hlái môi trum vaccine, hiăng pơlât prêi pơreăng COVID-19 ôh tá luâ 6 khế; pôi tá luâ 3 ngế rơtế tung môi tíu, rak tơniăn klâ kơtăn 2 met, pôi tá po kơmăi hngíu.

Katarina Nga tơplôu ƀă tơbleăng