VOV4.Sêdang - Kơxê lơ 22/9, Vi ƀan pơlê kong kơdrâm Ƀuôn Ma Thuột (Dak Lak) hiăng tơbleăng hlá mơ-éa kơxô̆ 4224 ‘na tơdroăng ăm phêp mâu tíu tê mơdró tơmeăm kâ, têa ôu (tíu tê hmê kâ, tíu tê tơmeăm ôu kâ, tíu tê mơdró ôu kơphế) vêh tê mơdró, pơxiâm sap ing 00h hâi lơ 23/9/2021. Pơtối mê, mâu tíu tê mơdró tơmeăm kâ – têa ôu, drêng vêh tê mơdró thế pêi tiô mâu pơkâ hbrâ, mơdât pơreăng COVID-19, môi tiah ôh tá chiâng tơdah lối 10 ngế  tơdrêng môi xôh; tâng tíu kân rơdâ lối 150 met karê châ tơdah ki vâ hên 20 ngế.

Mâu tíu tê mơdró thế ai ngế ki ối khăm ngăn ki tô tung châ, xếo kŏng ƀă pơkeăng, đi đo mơgrúa lĕm, xôh pơkeăng kơdê pơreăng kơƀăng tăng, tăng ‘nân klêi kơ’nâi rêm roh tơmối vêh. Nôkố, tơdroăng pơreăng xông tâ tú tung pơlê kong kơdrâm Ƀuôn Ma Thuột hiăng kâi mơdât, 6 tíu pơreăng xông tâ tú a mâu bêng Thành Nhất, Tân Thành, Tân Hòa hiăng châ mơdât, ôh tá ai ngế nếo tro tung pơlê pơla; tâi tâng pơlê kong kơdrâm ai 7 bêng, cheăm hluâ 14 hâi ƀă 11 bêng, cheăm hluâ 7 hâi ôh tá ai ngế nếo tro pơreăng tung pơlê pơla.

A Sa Ly tơplôu ƀă tơbleăng