VOV4.Sêdang - Tung roh pơlê kong kơdrâm Ƀuôn Ma Thuột pơkâ mơdât kuăn pơlê prôk lăm tung plâ 5 hâi pơtối vâ mơhnhôk tâi tâng kuăn pơlê tung pơlê kong kơdrâm kố lăm test kháng nguyên SARS-CoV-2, tơkéa vâ tối, túa tôe xo têa môh, têa hế vâ seá mơnhên ngăn hôm tâ tú pơreăng lơ ôh, mê khu râ kăn pơkuâ, hên khu mơdró kâ, tíu xiâm ngăn ‘na mơdró kâ hiăng pơtối hbrâ rơnáu tŭm hên mâu kơchâi, plâi, pôm, phái, hơ’neh mâm hnối pơtroh a kŏng dêi kuăn pơlê ki tro thế ăm klâ ối krê, ối kơtăn hơngế dêi pó.

Phiu ro tung kơyó ‘măn kế kâ ai kơchâi, hơ’nêh, kơtâ í xua khu ngế ki tơrŭm tung Tôh COVID pơlê pơla dêi tôh kơphô̆ 7, bêng Tân An, pơlê kong kơdrâm Ƀuôn Ma Thuột lăm kơchơ roê teăng ăm, nâ Trần Thị Hằng ối a troăng Nguyễn Xuân Nguyên ăm ‘nâi, rơpŏng nâ châ xoăng ăm phĭu lăm kơchơ kum ăm rơpŏng ki ê a kong măng lơ 26/8. Mê a kơxo má lơ 27/8, nâ pơtroh phĭu lăm kơchơ tung Zalo dêi bêng ƀă châ xo kế tơmeăm a kơxê hâi mê.

“Á hlo tơdroăng ki bêng tơbleăng lăm kơchơ kum ăm rơpŏng kuăn pơlê tung pơla pơlê kong kơdrâm dế pêi pro tơdroăng pơkâ 16 vâ mơdât pơreăng gá tơƀrê khât. Ngin rơhêng vâ roê klâi, bu kal alô tơkôm ngah peăng ing bêng kô ai ngế ki roê ăm djâ troh a hngêi vâ ăm rơpŏng ngin ối a hngêi ví pơreăng. Á hiăng hlo mâu Đoân droh rơtăm mâu nâ, o vâi kơhnâ khât ‘na tơdroăng ki tŏng kum ăm kuăn pơlê”.

Mâu ngế cheăng Tôh COVID-19 pơlê pơla lăm kơchơ kum kuăn pơlê a pơlê kong kơdrâm Ƀuôn Ma Thuột

Pơlê kong kơdrâm Ƀuôn Ma Thuột hiăng pêi pro tơdroăng ki klâ ối krê pơlê pơlâ tiô pơkâ 16 sap ing 18 chôu hâi lơ26/8. Tiah mê, tung 5 hâi apoăng, pơlê kong kơdrâm pơkâ thế kuăn pơlê pôi tá chiâng lo ing hngêi vâ tơkŭm ivá test rĕng ăm tâi tâng vâ chê 375 rơpâu ngế kuăn pơlê, vâ rĕng châ ‘nâi F0 lo ing pơlê pơla. Tung pơla kố, Vi ƀan hnê ngăn pơlê kong kơdrâm Ƀuôn Ma Thuột pơháu ăm mâu cheăm, bêng mơjiâng “siêu thĭ 0 liăn” vâ kum ăm mâu rơpŏng kuăn pơlê ki xơpá, tơdrêng amê hnối pêi pro túa pơkâ “Lăm kơchơ kum kuăn pơlê”. Pêi pro túa pơkâ kố a bêng Thống Nhất, pôa Nguyễn Khắc Sơn, kăn pơkuâ chi ƀô̆ xuân cho kăn pơkuâ Tôh kơphô̆ 1, ăm ‘nâi:

“Mâu rơpŏng kuăn pơlê kô châ xoăng ăm phĭu lăm kơchơ rơtế ƀă peăng pá rŏng ai chêh mâu tơdroăng pơkâ thế nhên mê kuăn pơlê kô chêh mâu kế tơmeăm ki vâi kal vâ a kơtâ hlá mơ-éa peăng pá rŏng. Kuăn pơlê xup ƀă pơtroh ing Zalo dêi tôh kơphô̆ ngin. Tôh kơphô̆ ngin kô tơkŭm ƀă pơtroh ăm Vi ƀan hnê ngăn bêng vâ Vi ƀan hnê ngăn bêng pêi pro hnoăng cheăng roê kế tơmeăm ăm kuăn pơlê”.

Ki phá tơ-ê tung tơdroăng ki kum kế tơmeăm ăm kuăn pơlê dế nôkố, cho rôh apoăng, mâu siêu thĭ, tíu xiâm tê mơdró a pơlê kong kơdrâm Ƀuôn Ma Thuột pêi pro tê kế tơmeăm tiô mâu “combo kế tơmeăm ki kal” ai hlâu ƀă mâu kơlo yă sap ing 100 troh 500 rơpâu liăn vâ pêi pro châ tiô tơdroăng ki rơhêng vâ roê xúa dêi kuăn pơlê. Rêm combo hmâ ai mâu kế tơmeăm môi tiah hơ’nêh mâm, ká, kơchâi, plâi, têa rơmâ, kế ki vâ pro kơhiâm, têa măm, kơtâ í, phái, mâu kế tơmeăm xúa ki ê dêi rơpŏng. Nôkố ai 5 tíu pêi cheăng tê a pơlê kong kơdrâm mê cho siêu thĭ Go Ƀuôn Ma Thuột, siêu thĭ Co.opmart Ƀuôn Ma Thuột, siêu thĭ MM Mega Ƀuôn Ma Thuột, tíu tê Vinmart, tíu tê Bách hóa xanh kô xúa tơdroăng ki tê online, tê tiô combo ƀă pêi pro tơniăn yă ƀă hên kế tơmeăm xúa kal xúa ki ê.

Jâ Trần Thị Thành Nhân, kăn phŏ pơkuâ siêu thĭ Co.opmart Ƀuôn Ma Thuột ăm ‘nâi, siêu thĭ hiăng hbrâ rơnáu xing xoăng kế kâ, kế tơmeăm xúa ki kal, xing xoăng mâu ngế cheăng ki lăm chiâng tơmeăm vâ rĕng pêi pro châ tơdroăng ki rơhêng vâ dêi mâu kuăn pơlê.

“Tíu pêi cheăng ngin xuân hiăng mơjiâng combo mâu kế tơmeăm kikal xúa ‘na kơchâi plâi pôm, hơ’nêh mâm, ká vâ kum ăm kuăn pơlê roê tơmeăm ki tơ’lêi hlâu má môi ƀă rĕng má môi. Ƀă hlá mơ-éa chêh tê kế tơmeăm online mê ing mâu troăng facebook, zalo, kơxô̆ phôn ki krếo tơdrêng tíu pêi cheăng kô xing xoăng mâu ngế cheăng vâ kum pêi pro hnoăng cheăng tơdah xo hlá mơéa chêh roê tơmeăm ƀă kơpong ki chêh kế tơmeăm xuân môi tiah pơcháu tơmeăm ăm tơmối châ rĕng, tơdrêng”.

Pôa Lưu Văn Khôi, kăn pơkuâ Khu ngăn cheăng kơmăi kơmok ƀă tê mơdró kong pơlê Dak Lak ăm ‘nâi, tiô riân ngăn dêi Khu ngăn cheăng kơmăi kơmok ƀă tê mơdró, kế tơmeăm ki tê xêh dêi kong pơlê mê chu ai 830 rơpâu to; kơpôu, ro ai 305 rơpâu to; khu í, peâp vâ chê 13 rơpâu to; kơchâi, plâi, pôm ai 10 rơpâu 500 ha ƀă hên ki ê cho hiăng hbrâ rơnáu ăm tơdroăng ki tê kế tơmeăm ối drêh, ối rêh. Rơtế amê, phái ƀă mâu kế tơmeăm, kế kâ ki ê hiăng châ ‘măn kơdĭng vâ chê 3 hdroh tâng vâ pơchông ƀă tiah hmâ. Kơxô̆ kế tơmeăm xúa ki kal châ rak tơniăn vâ kuăn pơlê hmiân tuăn rơtế ƀă tơnêi têa hbrâ mơdât pơreăng.

“Mâu kế tơmeăm gá hên khât ƀă mâu siêu thĭ, mâu tíu xiâm tê mơdró vâi hiăng ai túa pơkâ mơhnhôk kế tơmeăm pêi pro châ tiô tơdroăng ki ai tŭm kế tơmeăm, ƀă hmiân tuăn. Hâi hnah, hdrối pêi pro pơkâ 16 mê rôh kố xuân ôh tá ai xếo tơdroăng ki kuăn pơlê lăm roê kế tơmeăm tơkŭm a môi tíu, ‘na ki xiâm mê kuăn pơlê vâi xuân hiăng hmiân tuăn”.

Hdrối kố nah, Vi ƀan hnê ngăn pơlê kong kơdrâm Ƀuôn Ma Thuột ai hlá mơ-éa pơtroh ‘na tối tơbleăng tê mơdró kế kâ tung pơla klâ ối krê pơlê pơla tiô pơkâ 16/CT-TTg dêi Ngế pro xiâm hnê ngăn Chin phuh. Tiah mê, ƀă tơdroăng ki tê kế kâ ing troăng tê online kô châ pêi pro tiô 2 túa pơkâ. Má môi, kuăn pơlê pơkâ roê tơdrêng ing mâu tíu ki tê, mâu ngế ki cheăng ‘na tê, pơcháu tơmeăm dêi tíu pêi cheăng lăm chiân troh a hngêi ăm kuăn pơlê, liăn roê tơmeăm pơcháu tơdrêng ing măng lơ ăm tơdrêng klêi xo tơmeăm.

Má péa, kuăn pơlê pơkâ roê tơmeăm ƀă pơtroh liăn roê tơmeăm kum ăm ngế ki ê ing Tôh tŏng kum a thôn, pơlê, tôh kơphô̆ a mâu cheăm, bêng. Ƀă túa pơkâ kố, rơxế pơcháu tơmeăm dêi tíu tê kế tơmeăm troh a tơdrêng a mâ tôh tŏng kum cheăm, bêng, lơ Vi ƀan hnê ngăn cheăm, bêng xing xoăng mâu ngế cheăng, rơxế tơdah xo tơmeăm tơdrêng hlối a mâu tíu pêi cheăng ki tê (tung tơdroăng ki tíu pêi cheăng tê ôh tá châ teăm xing xoăng rơxế  chơ pơcháu tơmeăm), klêi mê pơcháu tơmeăm ăm kuăn pơlê.

Rơxế chơ tơmeăm cho rơxế pơcháu tơmeăm dêi tíu tê kế tơmeăm lơ rơxế xua khu pơkuâ cheăm, bêng mơnhên. Mâu ngế cheăng ‘na pơcháu tơmeăm dêi tíu tê athế xâp hmân ếo dêi tíu pêi cheăng ƀă ai phĭu séa ngăn pơreăng âm tĭnh.

VOV Tây Nguyên

Katarina Nga tơplôu ƀă tơbleăng