VOV4.Sêdang - Kơxê lơ 21/10, Vi ƀan pơlê kong kơdrâm Ƀuôn Ma Thuột, Dak Lak tơbleăng mơ-éa thâ, hnê mơhno mâu cheăm, bêng pêi pro kơtăng troăng hbrâ mơdât pơreăng vâ mơdât ƀă tơdroăng mâu ngế tro tâ COVID-19 tâk rĕng tung pơlê pơla. Pơtối mê, pơlê kong kơdrâm pơkâ pơtối pơtê mâu tơdroăng: Tíu ki kơhnhon xuâng, kuăn karaoke, ƀar, tíu massage, tíu xah internet, tíu xah hêi điê̆n tưh, tíu pôe xâk, tiú pro rơnuâ lĕm, kơpong xah hêi vâi hdrêng, tiú kơtú ƀalong; mâu kơchơ ki chiâng xêh, tơdroăng mơngế prôk chêng lăm tê tơmeăm utâi utá, tíu tê mơdró a hâng lông troăng, vĕ kơxô̆; pơtê tơdroăng tơkŭm khôp; Tơdroăng mơhno túa lĕm tro, xah hêi tíu tơdjuôm ƀă mâu tíu tê mơdró ‘na pơtân ivá, pơtâp ivá tung hngêi.

Khu ƀok thái pơkeăng pêi pro test rĕng rah xo mâu ngế tro tâ tung pơlê pơla

Ƀă mâu tíu tê mơdró tơmeăm kâ (hngêi tê tơmeăm kâ, kuăn kơphế) chiâng tê ăm tơmối ‘nân ối amê laga pơklâ thế tơniăn mâu pơkâ ‘na hbrâ, mơdât pơreăng COVID-19. Tung hâi lơ 21/10, Ƀuôn Ma Thuột châ hlo 30 ngế yương tĭnh ƀă SARS-CoV2, tung mê ai 12 ngế tung pơlê pơla. Pơlê kong kơdrâm hiăng ti tăng, xo mơheăm test rĕng dâng 4.000 ngế kuăn pơlê a ƀuôn Kô Sier, bêng Tân Lập vâ rĕng ti tăng F0 tung pơlê pơla, mơdât pơreăng. Xêo tơdjuôm lâp kong pơlê Dak Lak, hâi lơ 21/10 hiăng châ hlo 92 ngế tro tâ SARS-CoV-2. Kố cho kơxô̆ châ hlo ngế tro tâ hên má môi tung môi hâi sap ing hdrối nah troh nôkố.

A Sa Ly tơplôu ƀă tơbleăng