VOV4.Xơ Đăng - Pơlê kong kơdrâm Ƀuôn Ma Thuột, kong pơlê Dak Lak cho môi tung mâu pơlê kong kodrâm ki ai pêt loăng hên má môi tung kơphô̆ tâng vâ pơchông ngăn ƀă mâu kong pơlê ki ê tung lâp tơnêi têa, vâ riân nhên, tung 1 ngế ai lối 8 met karê loăng ngiât tâ tá. Khu loăng ki pêt drô troăng kơphô̆ dêi pơlê kong kơdrâm Ƀuôn Ma Thuột dế mơjiâng chiâng tíu ki rơngiâp lĕm ăm kuăn pơlê ƀă tơmối troh ôm hyô a tíu kố. Loăng ngiât dêi Ƀuôn Ma Thuột hâi kố cho tơdroăng ki pơtối athế pêt vâ ga rế rơngiâp lĕm, dâi khât ăm tơdroăng rêh ối troh a hơnăm 2030 ah, klêi mê, pơkâ pêt troh a hơnăm 2045 ah nếo.

Hâi apoăng hơnăm nếo, nâ Nguyễn Thị Loan rơtế ƀă 5 ngế kŏng nhân dêi Đô̆i 2, Kŏng ti pêi cheăng tiô rơnó Môi tung khu kong prâi tơnêi tơníu  Osaka lo lăm pêi cheăng rơnuâ hoa viên a Tíu ‘meăn um Pôa Hồ ƀă mâu hdrêng, troăng Lê Duẩn, pơlê kong kơdrâm Ƀuôn Ma Thuột. Ƀă hên kuăn pơlê, mâu kŏng nhân môi tiah nâ Loan cho mâu ngế kŏng nhân, mâu ngế pêi cheăng kơhnâ, vâi hiăng veăng kum rak vế pro lĕm, rak ngăn, pêt tơbêng mâu reăng ƀă rak ngăn mâu kế tơmeăm ăm pơlê kong kơdrâm. Luâ tâ tơdroăng ki ê, nâ Loan phiu ro drêng hnoăng cheăng ivá dêi mâu vâi nâ o tung đô̆i châ kuăn pơlê hlo nhên:

“Tối tơdjuôm châ pro lĕm ăm rêm ngế lăm ngăn tơnêi tíu ki lĕm, rêm ngế troh ngăn hlo lĕm vâi khĕn lĕm mê hlo hơniâp ro khât. Á hlo pêi akố á hâk tơngăm krúa lĕm, hên ngế troh ro xah hêi mê hiăng hâk mơnâ khât. Hơnăm nếo mê á rơhêng vâ pơreăng kân rĕng kâi châ hbrâ mơdât, rêm ngế pơrá trâm mâ dêi rơpó hơniâp ro”.

Ƀă troăng ngăn tung la ngiâ, túa pơkâ tơtro ƀă tơdroăng tơmâng ngăn ‘no liăn pro tro tơdroăng, Ƀuôn Ma Thuột dế rế hía rế châ mơjiâng vâ tơxâng cho kơphô̆ tíu xiâm kơpong Tây Nguyên

Mot tung hơnăm 2022, pơreăng kân COVID-19 a Ƀuôn Ma Thuột hiăng chía kơdroh, tơdroăng rêh ối dế rế hía rế vâ vêh tiah hmâ nếo. Hmiân tuăn vâ prôk chêng pơtâp ivá hâi apoăng hơnăm nếo a Công viên Sơn La a ngiâ hngêi, pôa Trần Đức Hòa, a troăng Y Ơn, bêng Tân Thành, pơlê kong kơdrâm Ƀuôn Ma Thuột phiu ro drêng tơnêi têa hiăng tơmâng ngăn ‘no liăn cheăng mơjiâng pro tíu ki kố. Pôa ăm ‘nâi, sap ing môi tíu tơnêi ki vâi chúa lôi ƀă ai hên tơdroăng ki rơ-iêo ki ê, mê nôkố hiăng chiâng môi tíu ki xah hêi lĕm ƀă gá rế hía rế ai pơxúa tâ ƀă kuăn pơlê klêi kơ’nâi ai pơreăng kân:

“Kuăn pơlê phiu ro khât, ai tíu ki pơtâp ivá, ai tíu ki vâ ăm vâi krâ nhŏng o, mâu vâi muăn xah hêi, ai chôu phut xah hêi, pơtê klêi kơ’nâi hâi pêi cheăng tơbrêi. Kố cho hlá xôu dêi pơlê kong kơdrâm ƀă dêi krê dêi kơpong kố. Á xuân lăm prôk hên tíu la chiâng vâ tối Ƀuôn Ma Thuột cho tíu ki ai hên loăng ngiât lĕm má môi tung lâp tơnêi têa. Tơnêi têa xuân tơmâng ngăn, ‘no liăn pro hên kế tơmeăm. Pơlê kong kơdrâm pro lĕm khât, ai túa pơkâ pêi pro tơniăn”.

Rêm víu kơphô̆, rêm to ‘noăng reăng, công viên, plông kân pơrá mơhno tơdroăng ki mơnhông ngiât, pêi pro troh ki pơxúa ăm pơlê pơla

Xông tơtêk ing tơdroăng ki ôh tá tơniăn dêi rôh tơplâ ƀă ngôi kơtâk dêi tơnêi khêi, tung khế hơnăm ki ton, Ƀuôn Ma Thuột hiăng pêi pro châ tơdroăng ki lĕm tung mơnhông. Rêm víu kơphô̆, rêm to kơ’lo reăng, tíu xah hêi, plông kân pơrá mơhno tối tơdroăng ki lĕm mơnhông ngiât, troăng tơmiât troh ki pơxúa ăm pơlê pơla. Djâ dêi kuăn kơdrâi tơxĭn prôk chêng a kơphô̆ tung hâi apoăng dêi hơnăm nếo, nâ Trần Thị Yến, a bêng Tự An, pơlê kong kơdrâm Ƀuôn Ma Thuột hlo phiu ro ƀă mâu kế tơmeăm ki kơnía châ pro sap ing mâu loăng ngiât ƀă tíu xah hêi môi tiah mâu kơpong “kong tung kơphô̆”:

“A Ƀuôn Ma Thuột pin mê á hlo ai hên tíu xah hêi, loăng ngiât. Malối cho mâu troăng prôk mê mâu loăng ngiât ki kân gá xuân hên, gá pro ăm hyôh kong prâi a kố krúa lĕm, ôh tá ai ngôi kơtâk, á hlo rếh ối a kố tơniăn, rêh ối akố á hlo rơhêng vâ khât”.

Mơjiâng “pơlê kong kơdrâm ngiât” ôh ti xê to a troăng kơphô̆, tíu xah hêi mê tơdroăng kố ối mơhno tối a plông dêi mâu kơ koan, kơvâ cheăng ƀă rêm rơpŏng kuăn pơlê, pơlê cheăm. Mâu kơ koan tơnêi têa rêm rôh mơjiâng pro nếo, ‘mâi rơnêu pơrá tơtrŏng troh tơdroăng ki rak vế loăng ngiât ki kân ƀă pêt tơ’nôm loăng ki nếo. Ƀă mâu pơlê tung kơphô̆, mơngiơk ngiât dêi loăng đi đo cho tơdroăng ki xiâm vâ pro ôh tá kâi piu ki lĕm dêi mơhno túa lĕm tro Tây Nguyên krip tơdrŏm.

Kŏng nhân rơnuâ hoa viên a Tíu meăn um Pôa Hồ ƀă vâi hdrêng a troăng Lê Duẩn

Pôa Võ Kỳ, kăn phŏ ngăn ƀơrô rak ngăn kơphô̆ pơlê kong kơdrâm Ƀuôn Ma Thuột ăm ‘nâi, tiô Pơkâ dêi Kuô̆k hô̆i ‘na klâ xing xoăng kơphô̆, ƀă pơlê kong kơdrâm túa má 1 ối tung kong pơlê, ƀăng tơnêi ai loăng ngiât tung pơlê pơla a kơpong pơlê kong kơdrâm, kơpong kơphô̆ châ 5 – 6 met karê tung môi ngế.

Tung pơla mê, loăng ngiât tung pơlê kong Ƀuôn Ma Thuột troh tâi hơnăm 2021 hiăng châ 8,11met karê tung môi ngế ƀă lâp pơlê kong kơdrâm ai 17,4 met karê tung môi ngế. Ƀă tơdroăng kố, Ƀuôn Ma Thuột nôkố cho môi tung mâu pơlê kong kơdrâm ai loăng ngiât hên má môi tung lâp tơnêi têa. Pêi pro tơdroăng 1 rơtuh xiâm loăng ngiât dêi Chin phuh, hơnăm hdrối nah, pơlê kong kơdrâm xuân hiăng tơbleăng ƀă klêi mê hiăng pêt châ lối 6 rơpâu to xiâm loăng. Tơdroăng pơkâ hơnăm 2022 kô pơtối mơdêk tơ’nôm ƀă mâu túa loăng ki xiâm cho loăng ki xiâm dêi Tây Nguyên:

“Nôkố pêt loăng ngiât hoa viên, công viên a pơlê kong kơdrâm Ƀuôn Ma Thuột ki hên cho mâu túa loăng ki xiâm hmâ pêt a kong pơlê, ai mơngiơk krê dêi kơphô̆ Ƀuôn Ma Thuột xuân môi tiah kơpong Tây Nguyên. Xúa mâu túa loăng môi tiah cho loăng kía, ka te, loăng rơnâng, cẩm lai lơ tơnia, kố cho mâu hdrê loăng ki ngin tí tăng ‘nâi plĕng ăm Khu pơkuâ ngăn Đảng ủy, Vi ƀan hnê ngăn kong pơlê pêt a pơlê kong kơdrâm”.

Pôa Vũ Văn Hùng, Kăn hnê ngăn Vi ƀan pơlê kong kơdrâm Ƀuôn Ma Thuột ăm ‘nâi, vâ mơjiâng pơlê kong kơdrâm ngiât châ môi tiah hâi kố, tung plâ hên chât hơnăm hdrối nah, mâu rơxông kăn pơkuâ dêi kong pơlê, dêi pơlê kong kơdrâm hiăng tơtrŏng ƀă ai troăng ngăn, ai túa pơkâ pêt loăng ngiât tiô túa ki tơtro má môi.

Troh nôkố, troăng ngăn ki mê dế pơtối châ mơdêk vâ mơjiâng pơlê kong kơdrâm Ƀuôn Ma Thuột tơxâng cho kơphô̆ kong kế, nhâ loăng, mơngiơk lĕm ƀă rơkê tiô chal nôkố tiô Mơgêi 67 dêi Khu xiâm pơkuâ tơdroăng kal kí ‘na mơjiâng, mơnhông Ƀuôn Ma Thuột troh hơnăm 2030, troăng ngăn troh hơnăm 2045.

Tiô tơdroăng pêi pro pơkâ Hneăng hôp kân Đảng ƀô̆ pơlê kong kơdrâm rôh má 15, hơnăm 2020 – 2025, ƀăng tơnêi pêt loăng ngiât a kơpong pơlê kong kơdrâm troh mơ’nui hneăng kô mơdêk 9 met karê tung môi ngế. Kố cho hnoăng cheăng ki xơpá drêng pơ’leăng mâ mơngế rế hía rế tâk tung pơla mâu tơnêi tơníu tơdjuôm ƀă liăn ngân ôh tá ai, la pơlê kong kơdrâm ối tơngah kô pêi châ ƀă mâu tơdroăng, troăng hơlâ pơkâ ki nhên.

“Tơnêi tơníu dêi pơlê kong kơdrâm cho athế pơtối châ mơdêk, lối 9 met karê tung môi ngế a pơlê kong kơdrâm ƀă 18 met karê tung môi ngế lâp pơlê kong kơdrâm. Laga mơdêk kô tơpá xua kuăn pơlê kô tâk ƀă ƀăng tơnêi ăm tơdroăng ki pêt loăng ngiât rế hía rế iâ. Tiah mê athế mơhnhôk kăn ƀô̆, kŏng nhân viên chưk rêm hơnăm ai hâi Têt tơbleăng pêt loăng mê iâ hlái rêm ngế pêt môi to xiâm loăng ngiât. Ƀă mâu kơpong kơphô̆ ki nếo tơtêk mê pơrá ăm pro mâu hoa viên, tâi tâng mâu hoa viên pơrá ai mâu tơdroăng ki pro troăng prôk chêng”.

Ƀă troăng ngăn tung la ngiâ, túa pơkâ tro rơkê ƀă tơdroăng tơmâng ngăn ‘no liăn tro kơlo, Ƀuôn Ma Thuột dế rế hía rế châ mơjiâng vâ tơxâng kơphô̆ tíu xiâm kơpong Tây Nguyên. Tung mâu tơdroăng ki ƀlêi chiâng dêi pơlê kong kơdrâm, tíu ki xiâm dế châ tối nhên mê cho tơdroăng ki pêt loăng ngiâ châ pơtih “kong tung kơphô̆”, pro chiâng tíu ối ăm kuăn pơlê ƀă tơmot tơmối troh lăm.

Công Bắc chêh

Katarina Nga tơplôu ƀă tơbleăng