VOV4.Sêdang - Kơxê lơ 7/9, Vi ƀan hnê ngăn pơlê kong kơdrâm Ƀuôn Ma Thuột, kong pơlê Dak Lak hiăng pơkâ hlá mơéa kơxô̆ 4016 vâ pro pơhôi mâu tơdroăng pơkâ tung hbrâ mơdât pơreăng COVID-19 a pơlê kong kơdrâm rế hía rế châ hbrâ mơdât klêi kơnâi 10 hâi pêi pro tơdroăng pơkâ 16 dêi Ngế pro xiâm hnê ngăn Chin phuh. Tiah mê, sap ing 17 chôu, hâi lơ 7/9, pơlê kong kơdrâm Ƀuôn Ma Thuột ăm phêp mâu tơmeăm ki mơjiâng pro a pơlê kong kơdrâm châ vêh mơjiâng pro nếo.

Tíu ki gak ngăn troăng prôk lăm a cheăm Čư̆ Êbur, pơlê kong kơdrâm Ƀuôn Ma Thuột

Pơlê kong kơdrâm xuân ăm phêp mâu tíu ki tê mơdró kế tơmeăm, tíu tê mơdró mâu xơmong prêi, tíu ki tê mơdrăn chĕm mơnăn châ vêh po tê nếo la xing xoăng pôi tá luâ tơdế tung tâi tâng kơxô̆ ngế pêi cheăng. Tơdroăng ki roê ƀă tê a mâu tíu tê mơdró kố athế rak tơniăn pêi pro kơtăng pơkâ 5K ƀă mâu tơdroăng pơkâ hbrâ mơdât pơreăng COVID-19.

Katarina Nga tơplôu ƀă tơbleăng