VOV4.Sêdang -Kơxo lơ 6/9, xua tơdroăng pơkuâ dêi pôa Phạm Minh Chính, Ngế pro xiâm hnê ngăn Chin phuh, mê Chin phuh hiăng hôp tiah hmâ khế 8 hơnăm 2021 vâ tơpui ‘na tơdroăng cheăng kâ rêh ối pơlê pơla khế 8 ƀă 8 khế hơnăm 2021; tơdroăng tơbleăng pêi pro pơkâ kơxô̆ 01/NQ-CP dêi Chin phuh; tơdroăng cheăng kâ rêh ối pơlê pơla hơnăm 2021 ƀă tiô tối hdrối Túa pơkâ mơnhông mơdêk cheăng kâ rêh ối pơlê pơla hơnăm 2022; tơdroăng pêi pro túa pơkâ ‘no liăn cheăng tơdjuôm hơnăm 2021, tiô tối túa pơkâ ‘no liăn cheăng tơdjuôm hơnăm 2022; túa pơkâ tơdroăng cheăng kâ hneăng hơnăm 2021 – 2025 ƀă mâu tơdroăng kal ki ê.

A rôh hôp, pôa Phạm Minh Chính pơkâ thế Khu xiâm rak liăn ngân tơkŭm mâu tơdroăng ki pơkâ mơ’no dêi mâu kơvâ cheăng, kong pơlê ‘na kơxô̆ liăn kum ăm hbrâ mơdât pơreăng; Khu xiâm ngăn cheăng pêi mố đô̆i tro rong ƀă rêh ối pơlê pơla hriăn ngăn ‘mot tơ’nôm inâi ăm khu ki hbrâ mơdât pơreăng; Khu xiâm ngăn troăng prôk ƀă rơxế kơtâu séa ngăn pơkâ môi tuăn, malối cho rak tơniăn ăm rơxế kơtâu troăng chơ kế tơmeăm, chơ kuăn mơngế kal ai hnê mơhno môi tuăn. Pơkâ thế cho rĕng séa ngăn tơdroăng vâ mơdêk mơnhông cheăng kâ rêh ối pơlê pơla tung tơdroăng nếo.

Katarina Nga tơplôu ƀă tơbleăng