VOV4.Xơ Đăng - Kơxê lơ 6/12, a Tíu pêi cheăng Chin phuh, pôa Lê Minh Khái, Ngế pro xiâm phŏ hnê ngăn tơnêi têa, Tôh trưởng Tôh pêi cheăng kơxô̆ 2 dêi Ngế pro xiâm hnê ngăn Chin phuh ‘na mơdêk ‘no liăn cheăng tơdjuôm pơkuâ po rôh hôp ‘no tơdrêng ing troăng hyôh internet ƀă mâu Khu xiâm, kơvâ cheăng Tơnêi têa ƀă 6 to kong pơlê Pơlê kong kân Cần Thơ, Long An, Trà Vinh, Hậu Giang, Sóc Trăng ƀă Kiên Giang vâ pơkâ tơleăng mâu tơdroăng ki xơpá tơvâ tơvân vâ mơdêk tơdroăng ki ‘no liăn cheăng tơdjuôm hơnăm 2021. Tơpui a rôh hôp, pôa Lê Minh Khái,Ngế pro xiâm phŏ hnê ngăn tơnêi têa tối nhên, hơnăm kố xua tơdjâk dêi pơreăng kân Covid-19 tung mê mâu kong pơlê a Kơpong tơbăng Kroăng Cửu Long tro tơdjâk ó khât, rơtế ƀă mâu tơdroăng ki ôh tá tơ’lêi hlâu mê tơdroăng ki ‘no liăn cheăng tơdjuôm ối hrá, kơxô̆ liăn ODA bu châ 29% túa pơkâ. Ngế pro xiâm phŏ hnê ngăn tơnêi têa pơkâ thế, mâu khu xiâm kơvâ cheăng tơnêi têa, kăn pơkuâ 6 to kong pơlê pêi prokơtăng mâu tơdroăng pơkâ dêi Chin phuh mơdêk ‘no liăn cheăng tơdjuôm tro tiô pơkâ ki hiăng tơhrâ, tiah mê tơkŭm séa ngăn tơrêm to mâu tơdroăng tơkêa môi ngăn tơdroăng ki xơpá tơvâ tơvân troh dâng lâi pơkâ tơleăng troh mê, malối cho hbrâ rơnáu pêi cheăng ƀă khu ki ‘no liăn cheăng pơkâ thế rak tơniăn tro tơdroăng, tơdrêng a mê hnối pơkâ tơleăng mâu tơdroăng ki xơpá tơvâ tơvân tâng lơ trâm tung pơla tối tơbleăng tơdroăng tơkêa.

Katarina Nga tơplôu ƀă tơbleăng