VOV4.Xơ Đăng - Ôh tá ai cheăng pêi, ôh tá pêi lo liăn ngân, athế hơ’lêh tơdroăng cheăng cho mâu tơdroăng ki mâu cô hnê mâm non pá kong hngêi trung tơnêi têa a Dak Lak athế trâm pá puât ó khât klêi kơ’nâi tâ tú pơreăng COVID-19 ton tiah nôkố. Tơdroăng ki pơtối rak mơngế cô hnê mâm non drêng ôh ta pêi lo liăn ngân cho tơdroăng ki pá ó khât a mâu hngêi trung mâm no pá kong hngêi trung tơnêi têa.

Vâ châ chât hơnăm pêi cheăng rak ngăn vâi hdrêng, cô yăo Trần Thị Hải, Hngêi trung mâm non tư thưk Tuổi thơ, ối a bêng Tân Tiến, pơlê kong kơdrâm Ƀuôn Ma Thuột ôh tá ƀĕng ê ai drêng thế pơtê cheăng ôh tá ai liăn khế tung môi pơla ton. Ôh tá môi tiah cô yăo mâu hngêi trung ki tơnêi têa mơ’no liăn mơjiâng pro, mâu cô yăo ki pêi cheăng a hngêi trung ki ôh tá xê tơnêi têa mơ’no liăn mơjiâng pro ôh tá châ hngêi trung tŏng kum.

Pơtê hnê hriâm mê ôh tá ai liăn. Vâ ai tơmeăm kâ tung tơdroăng rêh ối, mê cô hiăng ti tăng môi tơdroăng cheăng tê tơmeăm tung online ƀă pói tơngah kô rĕng vêh tơniăn ƀă tơdroăng rak vâi hdrêng. Cô yăo Trần Thị Hải tối:

‘’Sap ing mâu vâi muăn pơtê hriâm vâ hbrâ mơdât pơreăng troh nôkố mâu  ngin cô xuân pơtê. Tiah hmâ tŭm kơxô̆ liăn rôe tơmeăm khoăng kơnôm to a liăn khế, to lâi khế apoăng ối ai liăn rôe tơmeăm kâ, mê ton tiah kố xuân pá puât. Nôkố ai tơdroăng cheăng klâi mê pêi ki mê, tơkôm tơ’nôm môi pơla nếo ngăn hôm hngêi trung hôm châ vêh hnê há?’’.

Cô Hngêi trung mâm non Tây Nguyên, pơlê kong kơdrâm Ƀuôn Ma Thuột, kong pơlê Dak Lak mơgrúa hngêi trung lâm, tơmeăm xah hêi vâi hdrêng tung pơla pơtê xua pơreăng xông tâ tú

Ôh tá xê to thái cô pá puât mê mâu hngêi trung, khu lâm ki ôh tá xê tơnêi têa mơ’no liăn mơjiâng pro xuân pá puât drêng hngêi trung thế pơtê tơdroăng hnê hriâm tung hên khế hiăng hluâ. Cô yăo Đồng Thị Thuận, Cô pơkuâ hngêi trung Mâm non Tây Nguyên, a bêng Thành Nhất, pơlê kong kơdrâm Ƀuôn Ma Thuột, tối ăm ‘nâi, hngêi trung dế thế ‘’châi ko’’ tơdâng xo hnoăng liăn – mơ’no liăn vâ ‘’kâi trâng’’ hluâ hneăng pá puât kố.

Hngêi trung ai lối 40 ngế kăn ƀô̆, thái cô, mâu ngế pêi cheăng. Mâu muăn pơtê hriâm, hngêi trung ôh tá ai kơxô̆ liăn pêi lo laga xuân thế chêl mâu kơxô̆ liăn ki ê. Rêm khế kăn pơkuâ hngêi trung thế chêl kơxô̆ liăn môi tiah: liăn mung ki xiâm, liăn rơkâ hngêi arak liăn, nâp ƀaoh hiêm pơlê pơla, ƀaoh hiêm khăm pơlât, ƀaoh hiêm ôh tá ai cheăng pêi ăm cô, mâu ngế pêi cheăng tiô pơkâ.

Cô yăo Đồng Thị Thuận tô tuăn:

‘’To lâi khế kố hngêi trung ôh tá ai kơxô̆ liăn vâ mơhá liăn khế ăm mâu cô xua mê mâu cô pá puât ‘nâng. Pói tơngah mâu khu râ tŏng kum krê ăm kơvâ hnê hriâm. Ki rơhêng vâ tối cho mâu cô mâm non ai troăng tŏng kum krê vâ mơhnhôk mâu cô hnê a hngêi trung a lâm drêng hok tro vêh hriâm. Ki ê nếo, mâu kơxô̆ liăn tŏng kum xuân thăm pêi pro rĕng tâ vâ mơngế pêi cheăng châ kum rĕng tâ drêng pá puât xua pơreăng kân kố’’.

Hên cô mầm non ki hnê a hngêi trung ôh tá xê tơnêi têa mơ’no liăn mơjiâng pro ti tăng liăn ing tê tơmeăm tung online tung pơla mâu hngêi trung pơtê xua pơreăng xông tâ tú

Lâp kong pơlê Dak Lak nôkố ai 70 hngêi trung mâm non ki ôh tá xê tơnêi têa mơ’no liăn mơjiâng pro ƀă lối 80 khu vâi hdrêng hriâm a hngêi trung tư thưk, hngêi trung kuăn pơlê mơ’no liăn mơjiâng pro. Ki phá tơ-ê râ hriâm mâm non cho răk ngăn cho ki xiâm xua mê pá vâ tơkŭm po hriâm mơ’no tơdrêng tung um tiô troăng măng internet. Hngêi trung klĭng péa hbrâ mơdât pơreăng COVID-19, cô mâm non ki hnê a hngêi trung ki ôh tá xê tơnêi têa mơ’no liăn mơjiâng pro ‘’ôh tá ai cheăng pêi’’,

Mê cho ôh tá ai pêi lo liăn ing lâi. ‘Na tơdroăng tŏng kum khu ngế kố, pôa Phạm Đăng Khoa, Kăn pơkuâ hnê hriâm – hnê mơjiâng tuăn ngôa rơkê kong pơlê Dak Lak tối ăm ‘nâi:

‘’ ‘Na mâu tơdroăng pá puât ƀă hnê hriâm a hngêi trung ki ôh tá xê tơnêi têa mơ’no liăn mơjiâng pro, ki rơhêng vâ tối cho hnê hriâm râ mâm non mê Vi ƀan kong pơlê xuân hnê mơhno ăm Khu pơkuâ hnê hriâm – hnê mơjiâng tuăn ngôa rơkê xêo mâu cô hnê hriâm tung hngêi trung ki ôh tá xê tơnêi têa mơ’no liăn mơjiâng pro ƀă râ hriâm mâm non vâ tơbleăng Vi ƀan kong pơlê tơbleăng Chin phuh vâ châ tŏng kum liăn tiô pơkâ 68 dêi Chin phuh, mê ôh tá ai tơdroăng tŏng kum dêi Chin phuh mê mâu hngêi trung ki ôh tá xê tơnêi têa mơ’no liăn mơjiâng pro, ki rơhêng vâ tối cho hnê hriâm mâm non kô ôh tá kâi rêh tung môi pơla ki ton ki mâu hngêi trung thế klĭng péa’’.

Mâu hngêi trung hnê râ mâm non ai hnoăng kal khât, kum tơdroăng ki pá puât ƀă hngêi trung mâm non ki ôh tá xê tơnêi têa mơ’no liăn mơjiâng pro, ki rơhêng vâ tối cho mâu pơlê kơdrâm kuăn pơlê rêh ối, tơdrêng amê kum hên tung tơdroăng hnê hriâm a kong pơlê Dak Lak. Laga drêng pơreăng COVID-19 xông tâ tú ó môi tiah nôkố, mâu hngêi trung mâm non ki ôh tá xê tơ’nêi têa mơ’no liăn mơjiâng pro rơtế khu cô dế pá puât ‘’ tăng liăn vâ rôe tơmeăm kâ’’ vâ pơtối rak tơdroăng rêh ối ƀă tơdroăng pêi cheăng dêi hngêi trung.

Xua mê, mâu troăng hơlâ tŏng kum mâu hngêi trung mâm on ki ôh tá xê tơnêi têa mơ’no liăn mơjiâng pro ‘na tơmeăm khoăng; kơdroh xo hnoăng mơhá; mung liăn ki kơjo kal châ tơmâng tŏng kum hên tâ mê nếo.

Hương Lý chêh

A Sa Ly tơplôu ƀă tơbleăng