VOV4.Sêdang - Kơxê lơ 19/9 tiô chôu kong têa Cuba, mê cho a kơxo hâi lơ 20/9 tiô chôu  Việt Nam a Tíu cheăng Kăch măng pơlê kong xiâm La Habana, pôa Miguel Díaz-Canel, Kăn xiâm pơkuâ hnê ngăn cheăng Đảng má môi Khu xiâm pơkuâ Đảng Kŏng san Cuba, Kăn xiâm hnê ngăn kong têa Kŏng hoa Cuba hiăng pơkuâ roh leh tơdah kân krịp pôa Nguyễn Xuân Phúc, Kăn xiâm hnê ngăn tơnêi têa pin. Klêi kơ’nâi leh tơdah păng ‘nâng, pôa Nguyễn Xuân Phúc, Kăn xiâm hnê ngăn Tơnêi têa ƀă pôa Miguel Díaz-Canel pơkuâ xiâm khu râ kăn xiâm péa tơnêi têa tơkŭm po hneăng hôp.

Cuba kơjo tê ăm vaccine ăm Việt Nam

A roh hôp tơpui tơno, Péa ngế kăn xiâm pơkuâ môi tuăn tung la ngiâ péa pâ kal pơtối thăm tơrŭm cheăng kal kí ing tơdroăng tơpui tơno Khu râ kăn xiâm, pơtối rak đi đo, ƀeăn ƀĕng, mơdêk ki châ tơƀrê tung tơrŭm cheăng, tá Hneăng hôp tơpui leăng pơla péa Đảng, Vi ƀan Chin phuh, ti tăng pơchuât ngăn, ‘nâi plĕng kal kí pơla péa ngế xiâm tơpui kâ, Tơpui tơno troăng hơlâ pơla péa Khu xiâm pơkuâ lêng.

Pôa Nguyễn Xuân Phúc mơnê mâu kăn xiâm pơkuâ, Khu xiâm ngăn pơkeăng ƀă khăm pơlât ƀă kơvâ pro pơkeăng dêi Cuba mơhé tá hâi pâk tung tơnêi têa laga hiăng tối tơbleăng ăm dêi pó ƀă kơjo kân má môi vâ xing xoăng tê ăm, hnê kơmăi kơmok mơjiâng pro vaccine hbrâ mơdât COVID-19 dêi Cuba ăm Việt Nam. Kố cho vâ mơnhên ăm tơdroăng ki hôm păng ‘nâng ăm tơdroăng ki tŏng kum teăm tơdrêng ki Cuba đi đo ăm Việt Nam môi tiah rơkong tơpui tối dêi pôa Fidel Castro, Kăn xiâm pơkuâ kong têa Cuba ‘’Xua Việt Nam, Cuba hbrâ pleăng mơheăm chhá dêi tơná’’.

A Sa Ly tơplôu ƀă tơbleăng