VOV4.Xơ Đăng - Kơxo lơ 8/12, hiăng po Hneăng hôp má pái, Hô̆i đong hnê ngăn kong pơlê Dak Lak hneăng 10, hneăng hơnăm 2021 – 2026. Hơnăm 2021 cho hơnăm ki trâm hên tơdroăng xơpá, pơloăng mơnúa xua pơreăng kân COVID-19 pro.

Laga, mơgêi hơnăm 2021, Dak Lak ai 8 tơdroăng pơkâ pêi klêi ƀă tơkâ luâ pơkâ mơ’no, ki rơdêi ‘na mơdêk cheăng kâ a kơlo chía hên (tâk 5,1% tâng vâ pơchông ƀă khế kố hơnăm hdrối); nâp liăn ƀă mơhnhôk tơlo liăn cheăng tung lâp pơlê pơla tơkâ luâ túa pơkâ mơ’no, tiô riân châ lối 8 rơpâu rơtal liăn (tâk 10% tâng vâ pơchông ƀă tơdroăng pơkâ Hô̆i đong hnê ngăn kong pơlê pơcháu); kơxô̆ khu mơdró kâ vêh pêi cheăng nếo tâk hên, tê roê kế tơmeăm a kong pơlê châ rak tơniăn; hnoăng cheăng hnê hriâm ƀă hnê cheăng pêi, rak ngăn ivá châ chăn kuăn pơlê, tơdroăng rêh ối cheăng kâ pơlê pơla, kơdroh kơtiê, tŏng kum ăm kuăn pơlê trâm xơpá xua pơreăng kân COVID-19 châ tơmâng ngăn pêi pro.

Dak Lak: Ai 8/14 tơdroăng pơkâ Cheăng kâ rêh ối pơlê pơla pêi klêi ƀă tơkâ luâ pơkâ mơ’no

Tơpui hnê mơhno a hneăng hôp, pôa Nguyễn Đình Trung, Ngế cheăng tung tíu xiâm Đảng, kăn pơkuâ ngăn Đảng kong pơlê Dak Lak pơkâ thế: tung la ngiâ, rêm râ, mâu khu râ kơvâ cheăng pơtối pêi pro kơtăng tơdroăng pơkuâ, hnê mơhno dêi Tơnêi têa a tâi tâng mâu kơvâ cheăng, kong pơlê vâ tơbleăng tơƀrê tơdroăng pơkâ Hneăng hôp Đảng lâp tơnêi têa rôh má 13 ƀă tơdroăng pơkâ hneăng hôp Đảng ƀô̆ kong pơlê rôh má 17, malối cho tơkŭm pêi pro kơhnâ, tơƀrê tơdroăng pơkâ kơxô̆ 128 dêi Chin phuh.

Katarina Nga tơplôu ƀă tơbleăng