VOV4.Sêdang - Trung thu hơnăm kố cho môi roh ki kal khât ƀă hên vâi hdrêng ki ối kŭn dế pơlât a mâu hngêi pơkeăng ƀă kơpong ki klâ ối kơtăn, tíu ki mơdât prôk lăm vâ hbrâ mơdât pơreăng COVID-19 a Dak Lak. Ôh tá tâng idrâp ki chuât hơniâp ro dêi hơkâ xuâng prếo lơ tíu pro pơro ‘na nâ Hằng, tăm Cuội, mâu vâi o xuân ối hlo tơtô tâ drêng châ xo mâu kế tơmeăm trung thu ƀă tơdroăng ki tŏng kum ngăn khât dêi mâu khu râ, kơvâ cheăng, ƀă mâu ngế ki dế pêi cheăng a tíu kố.

Tơdah xo kơxuô tơmeăm Trung thu sap ing mâu tíu ki tŏng kum hbru ăm troh a hngêi, o H’Sa Muel Adrơng, a ƀuôn Pưk Prong, cheăm Ea Ning, tơring Čư̆ Kuin tối, kố cho Trung thu ki tơviah má môi ƀă o sap ing nah troh nôkố. Tung pơla kố, mâu hơnăm hdrối nah, o ƀă vâi o kơdrâi hâk tơkôm tơdah vâ têk on đĕng Trung thu lăm troh a hngêi mơhno túa lĕm tro dêi pơlê ƀă châ mâu vâi ngoh, nâ đoân viên droh rơtăm tơkŭm po hơdruê, xuâng, ngăn tăm Cuội, nâ Hằng. Hơnăm kố xua pơreăng COVID-19 tâ tú ôh tá tơniăn, ƀuôn Pưk Prong tro mơdât mot lo vâ hbrâ mơdât pơreăng mê tung pơlê hlo ôh tá hơniâp ro.

Laga, á xuân ối hơniâp ro xua châ xo tơmeăm Trung thu klăng a hâi Trung thu vâ nâ, o má xah kâ kơƀăn a tíu ki ‘măn kế tơmeăm a hngêi.

“Á hlo hơniâp ro drêng châ xo tơmeăm sap ing mâu ngoh, nâ, á kô tơkŭm po ăm ngin o ai môi rôh trung thu ki hơniâp ro khât. Á mơnê mâu ngoh, nâ Hô̆i đong kong pơlê ƀă Hngêi mơhno túa lĕm tro droh rơtăm mâu phô̆m vâ xông kân Dak Lak hiăng diâp tơmeăm ăm á”.

Hbrâ mâu kơƀăn Trung thu ăm vâi muăn

A kơpong pơlât cho hngêi pơkeăng lêng kơxô̆ 1 kong pơlê Dak Lak mâu hâi ki kố hlo hơniâp ro tâ. Rơtế ƀă hnoăng cheăng rak ngăn ƀă pơlât ăm mâu ngế ki tâ pơreăng, mâu kăn ƀô̆ cheăng akố ối teăng mâ mâu khu ki tŏng kum troh rêm kơbong vâ hbru tơmeăm Trung thu ăm mâu vâi muăn phô̆m vâ xông kân dế pơlât COVID-19. Ƀok thái pơkeăng chuyên khoa 2 Phạm Thị Tuyết Nhung, kăn phŏ pơkuâ Hngêi pơkeăng lêng kơxô̆ 1 ăm ‘nâi, akố, dế nôkố dế tơdah xo ƀă pơlât ăm vâ chê 500 ngế tâ pơreăng, tung mê ai 117 ngế vâi hdrêng, mâu vâi muăn ki kŭn má môi cho lối 1 khế tơdế.

Nôkố, ivá dêi mâu ngế ki tro pơreăng pơrá hiăng chía tơniăn, mơni kô rĕng prêi lĕm. Mâu hơnăm hdrối nah, hngêi pơkeăng châ xo tơdroăng ki tơmâng dêi khu tơrŭm, tíu pêi cheăng, ing mâu kăn ƀô̆ cheăng tung hngêi pơkeăng vâ hbru ăm kế tơmeăm Trung thu ăm mâu vâi muăn. Ƀok thái pơkeăng Phạm Thị Tuyết Nhung tối tiah kố, mê cho tơdroăng cheăng pêi ki ai pơxúa, kum mơhnhôk hiâm mơno mâu vâi muăn, kơnôm tiah mê kum mâu vâi muăn hmiân tuăn, hơniâp ro, ôh tá tơmiât hên, veăng kum pro ‘nâng ‘nâi hâi khế pơlât ƀă mơdêk ivá kâi trâng vâ rĕng prêi lĕm.

“Vâi o ối tung kố ôh ti xê to châ pơlât, châ rak ngăn ivá mê ối châ hnê mơhno, pro tiah lâi vâ mâu vâi o mơ-eăm tơkâ luâ dêi tơná, tơkâ luâ tơdroăng ki châi tamo vâ rĕng châ vêh dêi ƀă rơpŏng hngêi. Trung thu hơnăm kố hngêi pơkeăng hlo hơniâp ro ƀă xuân veăng kum tung tơdroăng rĕng ‘mâi mơnhông mâu tơdroăng xơpá, tơkâ luâ pơreăng vâ vêh dêi ƀă rơpŏng hngêi, ƀă pơlê pơla”.

Mâu kơƀăn, tơmeăm châ pơtroh a mâu ngế cheăng tung hngêi pơkeăng ƀă kơpong ki ăm klâ ối krê vâ pơcháu ăm vâi muăn

Hlo tơdroăng tâ tú rơ-iêo dêi pơreăng COVID-19, hên tơring, cheăm a Dak Lak dế athế pêi pro klâ ối krê, mơdât mot lo vâ hbrâ mơdât pơreăng. Ƀă rơhêng vâ pro ai pơxúa ăm mâu vâi o phô̆m vâ xông kân ai môi rơnó Trung thu phâi tơtô ƀă ai pơxúa, rêm râ Đoân, Hô̆i, Đô̆i tung kong pơlê hiăng tơrŭm ƀă mâu kơ koan, tíu pêi cheăng ƀă mâu khu ki ai hiâm mơno hơ-ui tơkŭm po tơdroăng Trung thu pơxá “Tơdrong on đĕng têk bâ eăng tơdroăng ki tơmiât – Veăng kum rơtế ƀă vâi o kŭn, tơdjuôm ivá tơkâ luâ pơreăng kâ”.

Ngoh Trần Doãn Tới, kăn phŏ pơkuâ Đoân droh rơtăm kong pơlê Dak Lak ăm ‘nâi, tơdroăng kố kô pơtroh ăm vâi o mâu kế tơmeăm, kơ-ƀăn Trung thu, liăn hriâm rơkê, on đĕng tơdrong, têa tôu ro ƀă kế tơmeăm xúa tung hriâm tâp. Laga, ngăn a tơdroăng ki ai khât a tơring, cheăm, khu tơrŭm Đoân droh rơtăm kô tơkŭm po mâu tơdroăng pêi pro tơtro ai pơxúa vâ rĕng tŏng kum ƀă mơhnhôk mâu vâi o tung rôh trung thu hơnăm kố.

Krê ƀă râ kong pơlê, Hô̆i đong đô̆i kong pơlê tơrŭm ƀă mâu khu ki tŏng kum kô diâp 500 hnoăng tơmeăm troh ăm mâu vâi o phô̆m vâ xông kân ki ai tơdroăng rêh ối xơpá, ƀă mâu vâi o ki dế pơlât lơ dế tro klâ ối krê, tro mơdât mot lo vâ hbrâ mơdât pơreăng COVID-19.

“Ƀă mâu tíu pêi cheăng, kơpong ngiât, trĭng ƀă khêi iâ, lơ khêi mê rah xo mâu tơdroăng ki tơkŭm po ăm tơtro, tiah lai vâ mâu vâi muăn ki ai tơdroăng rêh ối xơpá, mâu vâi muăn ki dế ối tung kơpong tro mơdât mot lo, mâu vâi muăn kuăn tê, vâi hdrêng ki chó chêng tơvê kŏng ai Têt Trung thu phâi tơtô maluâ tung tơdroăng ki ôh tá châ tơkŭm hên ngế. Ƀă râ kong pơlê mê Khu pơkuâ ngăn Đoân droh rơtăm kong pơlê, Hô̆i đong đô̆i kong pơlê hiăng tơkŭm po a hngêi pơkeăng lêng ƀă mâu hngêi pơkeăng kơpong vâ rak ngăn ƀă djâ Trung thu troh ƀă mâu vâi muăn”.

Mâu kơƀăn, tơmeăm kố maluâ iâ la ai pơxúa rĕng troh a kŏng mâu vâi muăn tung rơnó Trung thu hơnăm kố

Môi rơnó Trung thu troh phá tơ-ê ƀă mâu hơnăm hdrối, xua tơdjâk dêi pơreăng COVID-19, hên vâi hdrêng Dak Lak rơtế tung lâp tơnêi têa ôh tá rôh ki châ têk on đĕng lơ ngăn kơhnhon xuâng prếo. Laga, ƀă tơdroăng ki tơmâng ngăn sap ing khu kăn pơkuâ mâu khu râ kơvâ cheăng mâu vâi o hiăng châ tơdah rơnó Trung thu tơtôu ƀă ai pơxúa ƀă mâu kế tơmeăm ki mơhnhôk tơdrêng ƀă ai pơxúa.

H’Xíu H’Mok chêh

Katarina Nga tơplôu ƀă tơbleăng