VOV4.Xơ Đăng - Klêi kơ’nâi 2 khế mơhnhôk tơdroăng ‘’Hyôh ƀă kơmăi tĭnh ăm o’’, kơvâ hnê hriâm kong pơlê Dak Lak hiăng veăng tơlo châ lối 4,5 rơtal liăn pêi pro tơdroăng tŏng kum kơmăi tĭnh, phôn râng kŏng ăm mâu hok tro ai tơdroăng rêh ối pá puât.

Dak Lak: Lối 4,5 rơtal liăn pêi pro tơdroăng ‘’Hyôh ƀă kơmăi tĭnh ăm o’’

Tiô Khu pơkuâ hnê hriâm – hnê mơjiâng tuăn ngôa rơkê Dak Lak, dêng ai pơreăng xông tâ tú ton dêi COVID-19, lâp kơvâ mơnhên tơdroăng tơkŭm po hnê hriâm mơ’no tơdrêng tung um tiô troăng măng internet cho troăng pêi tơniăn ƀă mơni kô pêi pro ton xŏn. Laga, lâp kong pơlê u ối lối 268.000 hok tro ôh tá ai phôn râng kŏng vâ hriâm mơ’no tơdrêng tung um; tung mê, hok tro râ má môi ôh tá ai tơmeăm vâ hriâm mơ’no tơdrêng tung um, châ lối 60%.

Kơvâ hnê hriâm kong pơlê Dak Lak dế pơtối mơhnhôk mâu khu tŏng kum mơngế pá puât pêi pro tơdroăng ‘’Hyôh ƀă kơmăi tĭnh ăm o’’, tơdrêng amê mơdêk ki châ tơƀrê dêi tơdroăng, la ngiâ kêi đeăng hnoăng cheăng ‘’Pơtê tơdroăng troh hngêi trung laga ôh tá pơtê tơdroăng hriâm’’.

A Sa Ly tơplôu ƀă tơbleăng