VOV4.Sêdang - Mâu tíu pêi cheăng ngăn ‘na on tơhrik Dak Lak hiăng pêi  klêi tơdroăng ‘mâi rơnêu troăng kơxái on tơhrik ki kân, ‘mâi  rơnêu pro on tơhrrik ki vâ ‘no ăm dâng 16 rơpâu 500 rơpŏng a mâu tơring Ea Kar, M’Drak, Ea Hleo. Hdrối mê, xua tơdjâk dêi khía mơhot kân xô̆ 5 plong mot, kong mêi kân hlối ai khía jâ kơdo rơvê têi hiăng pro kơtong hên mâu trăng on tơhrik, kơtê kơxái on tơhrik, pro tơ’nhiê tíu ‘măn kơmăi on tơhrik a mâu tơring ki mê.

Khu ngăn on tơhrik Ea Kar ‘mâi rơnêu kơxái on tơhrik

Môi tiah a kơpong tơkăng kong tơring Ea Kar ƀă MDrak. Kong mêi kân pro tơnêi rơlâm tơhnâp, loăng kơtong tơđô tâu a troăng kơxái on tơhrik dêi troăng kơxái 471F18, pro chiâng tơpâ on tơhrik ăm 11 rơpâu 600 ngế ki xúa a péa tơring mê. Mâu trăng on tơhrik kơtong, tíu tơ’nhiê a kối ngo rơ-iô, xơpá tung tơdroăng cheăng ‘mâi rơnêu pro. La khu ngăn on tơhrik tơring Ea Kar hiăng rĕng mơhnhôk tăng mơngế, rĕng pê klêi ‘mâi rơnêu troăng kơxái on tơhrik vâ rĕng ai on tơhrik ‘no hâi apoăng măng tĭng kố.

Khu ngăn on tơhrik Ea Hleo pơ’lêh trăng ƀă ‘mâi rơnêu kơmăi ki mơ’no on tơhrik ki tro tơ’nhiê xua khong mêi khía

Môi tiah mê, a tíu ki xua Khu ngăn on tơhrik tơring Ea Hleo rak ngăn, khía jâ kơdo rơvê têi pro tơđôu môi to trăng on tơhrik ƀă hlối tơ’nhiê 1 tíu krâ ‘măn kơmăi ki mơ’no ƀă pro ăm dâng 5 rơpâu rơpŏng chiâng tro tơdjâk ôh tá ai on tơhrik. Tơdroăng ‘mâi rơnêu pro hiăng châ tíu pêi cheăng pro tơdrêng klêi tung hâi ki mê.

A mâu tơring ki  ê, mâu tíu pêi cheăng ngăn on tơhrik Dak Lak xuân hiăng ăm mâu ngế gak ngăn vâ rĕng teăm ‘mâi rơnêu pro drêng ai tơdroăng xiá vâ ‘na on tơhrik xua ing kong mêi khía pro, malối cho a mâu kơpong ki ăm klâ krê pơlât mâu ngế tâ COVID-19.

Gương tơplôu ƀă tơbleăng