VOV4.Sêdang - Tung kơxô̆ lối 1.700 ngế tâ pơreăng COVID-19 a Dak Lak ôh tá iâ mâu ngế ki tâ cho mâu vâi kơdrâi ki hiăng troh hâi khế rơneh kuăn ngá. Mâu vâi o kŭn kot mâ tung tơdroăng ki trâm pá xua COVID-19 dế ai mâu hâi ki tơviah, xua ai tơ’nôm mâu ngế nôu ki têm rơpiât cho ƀok thái pơkeăng, đi đo ai hên tơdroăng ki hơ-ui pâ ƀă hnoăng cheăng pôu râng dêi tơná.

Mơhé kơhnâ khăm ngăn ivá ăm mâu ngế vâi o ki châi tamo, nâ Bùi Thị Thu Hương, ngế cheăng pơlât ngăn khu vâi hdrêng Khoa Nhi hồi sức cấp cứu vâi hdrêng ki klêi mơhum, Hngêi pơkeăng Đa Khoa Kơpong Tây Nguyên moi hâp hmôu pơ ngăn dêi chôu. Troh a 15h, nâ xo kơƀin têa tôu nôu ki hiăng tah pơreăng, lăm pâ têa tôu nôu mâu ngế nôu ki nếo klêi mơhum kuăn ngá tơkôm ngăn dêi kuăn, klêi mê ăm têa tôu ki mê mơ-âu ăm mâu vâi kuăn ngá ki nếo klêi mơhum ki ai nôu cho F0 dế pơlât akố.

Pakĭng pâ têa tôu nôu ăm kuăn ngá, nâ Hương rơtế ƀă mâu vâi pú ối pơ’lêh dêi rơpó mơhum, pơ’lêh kên, khăm ngăn ivá mâu vâi o kŭn. Nâ ăm ‘nâi, riân sap ing mâu vâi kuăn ngá kot mâ ki ai nôu cho F0 pơtroh ăm Khoa hồi sức cấp cứu vâ  pơlât rak ngăn vâi hdrêng, mê môi rơpŏng hngêi nếo môi tiah hiăng ai a tíu kố. Mâu vâi nâ cheăng điều dưỡng ki pơlât ngăn kuăn ngá tamo chiâng mâu ngế nôu dêi vâi hdrêng, kơhâi lơ kơmăng cheăng rak ngăn mâu vâi kuăn ngá:

“Mâu vâi kuăn ngá mê ôh tá ai ngế nôu ăm âu, ngế nôu pin râng dêi , vâi kuăn cho mâu ngế ki ôh tá mơhúa mê tâi tâng mâu kăn ƀô̆ cheăng ngăn pơkeăng akố ngăn vâi kuăn ngá môi tiah dêi kuăn dêi cháu rơpŏng hngêi tơná, vâ rak ngăn ăm vâi mâu tơdroăng ki lĕm hơ-ui pâ mơjo teăng nôu vâi kuăn ngá. Xua nôu vâi ăm klâ krê ôh tá chiâng vâ xo têa tôu nôu ăm kuăn vâi âu, mê ngin ki pêi cheăng akố lăm pâ têa tôu mâu vâi nôu ki ai têa tôu rơlối vâ ăm mâu kuăn ngá ki mê âu vâ tơniăn ăm kuăn ngá châ âu tôu mâu ngế nôu mo lĕm’’.

Nâ Hương, ngế điều dưỡng dế rak ngăn kuăn ngá tung veăng klâ ối krê

Rơtế rak ngăn mâu vâi o ngá ki nếo klêi kot mâ a Khoa Nhi hồi sức cấp cứu, nâ Dương Thị Hoa, ngế cheăng pơlât ngăn akố hlối khăm ngăn ivá dêi mâu vâi kuăn ngá, hlối hbrâ mâu tơdroăng vâ tơdah tơ’nôm 2 ngế o ngá ki nếo klêi kot mâ ai nôu F0. Nâ Hoa ăm ‘nâi, tơdrêng ƀă tơdroăng hbrâ rơnáu hlối tơtrŏng má môi tung tơdroăng cheăng hbrâ mơdât pơreăng, mâu vâi nâ cheăng khăm pơlât akố ƀă tâi tâng khu ki cheăng tung khoa ki mê ối tơmâng khât troh tơdroăng hbrâ têa tôu nôu, vâ mâu vâi o ai ivá lĕm kâi trâng mơdât pơreăng, ai tŭm trếo kơhiâm vâ tung châ tuăn ngôa xông tơ-ƀrê tung mâu khế apoăng nếo klêi kot mâ:

“Tơdroăng ‘na têa tôu mê nôkố ai to lâi to khu tŏng kum vâi ăm têa tôu ki pro hngíu, la mâu vâi nâ troh nôkố hiăng xo ‘măn tah ki hngíu klêi mê ăm vâi o âu. Tâng têa tôu nôu dêi nôu mâu vâi o  ăm vâi o âu tung veăng mê ối rơlối mê á xo ăm kuăn ngá ki kố âu, tâng ôh tá bê a xo têa tôu ki pro hngíu tá ăm kuăn ngá âu tơ’nôm”.

Nâ Hoa ngế điều dưỡng dế mơ-eăm tăng têa tôu nôu ăm mâu vâi kuăn ngá vâ ăm kuăn ngá âu, ăm vâi o ai  ivá rơdêi

Tiô ƀok thái pơkeăng Chuyên khoa II, cho pôa Nguyễn Đức Toàn, cheăng ngăn kơvâ Khoa Hồi sức cấp cứu Nhi, Hngêi pơkeăng kân kơpong  Tây Nguyên tối, tơdroăng rak ngăn mâu vâi kuăn ngá ki nếo klêi kot mâ ai nôu F0 châ khoa ki kố mơhno ăm tíu ối a 2 kơpong krê xêh, cho kơpong rak ngăn ki tiah hmâ ƀă kơpong rak ngăn klâ ăm ối  krê vâ hlối pơlât ƀă hlối rak ngăn. Klêi 14 hâi, tâng ivá vâi mê xông mo lĕm tiah hmâ ƀă ăm 3 hdrôh khăm ngăn hlo tơniăn âm tính ƀă SARS –CoV -2, khăm ngăn ƀă Realtime-PCR kô pơtroh ăm vâi lăm ối a tíu rak ngăn ki tiah hmâ vâ tơkôm nôu vâi ƀă pâ vâi klêi mâu hâi pơlât prêi COVID-19 ah vâi vâ xo djâ dêi o kŭn vêh.

Ƀok thái pơkeăng Nguyễn Đức Toàn ăm ‘nâi, mơhé kơxô̆ vâi hdrêng kot mâ thế rak ngăn kơvâ ki krê ôh tá hên, la tung pơla dế ôh tá tơniăn rơ-iô dế ai COVID-19 mê mâu ƀok thái pơkeăng, mâu điều dưỡng akố la lâi xuân hbrâ rơnáu tơtrŏng đi đo:

“Tơdroăng rak ngăn môi ngế kuăn ngá ôh tá ai ngế nôu ngế pâ vâi cho môi tơdroăng pá puât khât păng ‘nâng, teăng nôu pâ vâi, teăng rơpŏng hngêi ai ngế nôu mê pêi viâ mâu tơdroăng păn roăng, rak ngăn, akố cho rak ngăn tŭm tâi tâng, xua mê điều dưỡng thế đi đo prôk ngăn tâng tơngôu iâ ah lơ chiâng rế râ, ah ôh tá teăm. Xua mê rak ngăn môi ngế ki tro tâ COVID mê ki pá gá tơ’mô pơlât tơdrêng 3 ngế kuăn ngá há, xua mê tơdroăng cheăng dêi điều dương tơbrêi khât ƀă hlối chiâng pôu ko’’.

Kot mâ a pơla dế ai pơreăng COVID-19, thế klâ ing ngế nôu ki mơhum, cho môi tơdroăng ki ôh tá mơhuá kân dêi vâi kuăn ngá ki nếo kot mâ.  Laga  a Hngêi pơkeăng kân kơpong Tây Nguyên, mâu vâi o đi đo châ mâu thái pơkeăng, mâu nôu ki têm hơ-ui ngăn krâu khât. Mâu vâi kuăn ngá ki oh tá ai tro tơdroăng klâi, ƀă má lối xuân dế xông kân rêm hâi tung kơpeăng kŏng mâu ngế nôu ki hơ-ui mơjo pâ.

Nam Trang chêh

Gương tơplôu ƀă tơbleăng