VOV4.Xơ Đăng - Sap ing khế 10 troh nôkố, kong pơlê Dak Lak ‘nâi kơxô̆ ngế tâ COVID-19 tâk hên ƀă dế chiâng môi tung mâu kong pơlê ki rơ-iêo ‘na pơreăng COVID-19 dêi lâp tơnêi têa. Hlo tơdroăng ki xơpá dêi pơreăng kân, hnoăng cheăng hbrâ mơdât a Dak Lak hiăng mơhno tối hên mâu tơdroăng ki ôh tá tơƀrê, malối cho ‘na mâu ngế cheăng, ivá séa ngăn ƀă tơdroăng ki pâk vaccine. Kong pơlê dế mơ-eăm ‘mâi mơnhông mâu tơdroăng ki ôh tá tơniăn ƀă kơdroh ivá ki tâ tú rĕng ‘na kơxô̆ ngế tâ pơreăng.

Kong pơlê Dak Lak tung roh má 4 dêi pơreăng COVID-19 hiăng châ hlo kơxô̆ ngế tro tâ tâk hên ƀă lối 5.000 ngế kơxô̆ tro tâ COVID-19 tung mâu hâi hiăng hluâ. Tung mê pơlê kong kơdrâm Ƀuôn Ma Thuột hiăng hluâ 1 rơpâu ngế. Tung kơxô̆ lối 600 ngế nếo tro tâ dêi 2 măng tĭng hiăng hluâ, troh 90% ngế châ hlo tung pơlê pơla, mơdêk tơdroăng pơreăng xông tâ tú a pơlê kong kơdrâm Ƀuôn Ma Thuột tối ăm ‘nâi, COVID-19 a pơlê kong kơdrâm nôkố pá vâ ti tăng châ hlo tâi tâng mâu ngế ki tro tâ pơreăng châ tơƀrê păng ‘nâng.

‘’Nôkố ngế tro tâ tung pơlê pơla ôh tá ‘nâi xiâm kối tâ tú mê ki rơhêng ‘nâi tơdroăng kố xiâm kối mơngế ing kơpong pơreăng vêh ôh tá tơbleăng ăm ƀok thái pơkeăng ƀă ôh tá pêi pro klâ kơtăn a hngêi. Nôkố pêi pro ti tăng mâu ngế F1 mê cho pá ‘nâng xua kơxô̆ ngế tro tâ hên. Laga pơlê kong kơdrâm xuân mơjiâng 21 bêng, cheăm mơjiâng tôh ti tăng mâu ngế tro tâ, klêi mê tôh ti tăng mâu ngế tro tâ dêi pơlê kong kơdrâm nếo. Klêi mê Viê̆n vê̆ sinh dich tễ Tây Nguyên xuân tŏng kum ăm môi khu vâ lăm ti tăng mâu ngế tro tâ pơreăng, tơkŭm test tâi tâng pơlê kong kơdrâm’’.

Khu ƀok thái pơkeăng test rĕng ăm kuăn pơlê a pơlê kong kơdrâm Ƀuôn Ma Thuột

Kơxô̆ mơngế tro tâ pơreăng tâk hên tơdrêng amê tơdroăng pâk vaccine tung lâp kong pơlê Dak Lak nôkố a kơlo ki iâ tung lâp tơnêi têa. Xêo troh apoăng khế 11, kơxô̆ ngế châ pâk trum má môi châ 58,6% ƀă pâk tŭm 2 trum cho 9,11%. Kơxô̆ mơngế châ pâk vaccine iâ hiăng pro mơdêk tơdroăng ki tâ tú tung pơlê pơla xuân môi tiah pro pá ăm tơdroăng pơlât mâu ngế tro tâ pơreăng.

Pôa Trịnh Quang Trí, Kăn pơkuâ Tíu xiâm mơdât pơreăng CDC kong pơlê Dak Lak tối ăm ‘nâi: Troh hâi lơ 30/10, kong pơlê Dak Lak hiăng tơdah dâng 1 rơtuh kung kếo vaccine hbrâ mơdât COVID-19 ing Khu xiâm tơnêi têa. Tâng pâk tâi kơxô̆ vaccine kố kô pâk châ 72% kơxô̆ mơngế châ pâk trum má môi ƀă kơlo pâk xuân nếo châ kong pơlê thăm pêi pro rĕng.

‘’Mâu hngêi pơkeăng cheăm, bêng nôkố mê pâk dâng 200 – 300 trum ăm 1 môi cheăm môi hâi. Xua mê lâp kong pơlê mê kơlo tơdâng môi hâi dâng 40.000. Tâi tâng kơxô̆ vaccine pâk mơgêi hdrối hâi lơ 5/11. Rơtế amê, tiô tối hdrối tung khế 11/2021 kô tơdah mâu roh vaccine ki ê. Krê pơlê kong kơdrâm Ƀuôn Ma Thuột, tơkêa 100% kuăn pơlê sap ing 18 hơnăm tơngi klêng kô châ pâk ki vâ iâ môi trum vaccine hbrâ mơdât COVID-19 hdrối hâi lơ 15/11/2021’’.

Rĕng pâk vaccine ăm tâi tâng kuăn pơlê cho troăng pêi ki pơxúa má môi vâ hbrâ mơdât pơreăng COVID-19

Kong pơlê Dak Lak hiăng châ hlo lối 5.000 ngế tro tâ COVID-19, tung mê ai 50% kơxô̆ ngế dế pơlât. Ki tơtrŏng má môi, 10 hâi la ngiâ kố, kơxô̆ mơngế tro tâ tung môi hâi a Dak Lak đi đo a kơlo 3 kơxô̆, kơxô̆ mơngế tro tâ tung pơlê pơla hên ƀă hên tíu pơreăng xông tâ tú râ ó. Tiô pôa Nay Phi La, Kăn pơkuâ ngăn pơkeăng ƀă khăm pơlât kong pơlê Dak Lak, tâng pơreăng xuân ôh tá kơdroh tung mâu hâi la ngiâ, mê kong pơlê kô thế tơkŭm tâi tâng ivá pơlât F0, ƀă mơni kô kal troh tơdroăng ki tŏng kum.

‘’Thế mơdât sap ing râ má 1 ƀă râ má 2 mê akố kô ai tơdroăng pá puât ‘na ƀok thái pơkeăng veăng pơlât mê ƀă kơvâ ngăn pơkeăng ƀă khăm pơlât Dak Lak ai dâng 30 ngế ƀok thái pơkeăng, cho ôh tá kâi vâ pơlât, mê ing mê thế krếo tơ’nôm tơdroăng tŏng kum dêi Tơnêi têa xuân môi tiah Hngêi pơkeăng Chợ Rẫy ƀă drêng hên ngế tro tâ pơreăng mê kơvâ ngăn pơkeăng ƀă khăm pơlât pơkâ pêi pâ tơmeăm khoăng Hngêi pơkeăng pơtân dêi Hngêi pơkeăng pơlê kong kân Hồ Chí Minh, hngêi pơkeăng Bình Dương klêi kơ’nâi hiăng kêi đeăng hnoăng cheăng tơvêh ‘măn vâ hbrâ ăm tơdroăng ki hên ngế tro tâ pơreăng má môi dêi kong pơlê’’.

Kơxô̆ mơngế tro tâ pơreăng tâk rĕng Dak Lak thế pơtroh tơ’nôm mâu kơpong pơlât mâu ngế tro tâ pơreăng COVID-19

Tung roh lăm séa ngăn, tŏng kum kong pơlê Dak Lak hbrâ mơdât pơreăng hâi lơ 27/10 pơla kố nah, Khu pêi cheăng dêi Hngêi pơkeăng kân Chợ Rẫy xuân hnê ‘na tơdroăng pơlât, túa ki rơkê tung pơlât ƀă mơngế tro tâ COVID-19. Tiô tiên sih, Ƀok thái pơkeăng Nguyễn Tri Thứa, Kăn pơkuâ hngêi pơkeăng kân Chợ Rẫy, Dak Lak kal kơdroh iâ má môi tơdroăng ki tơ’lêi tâ tú ăm dêi pó tung kơpong pơlât, klâ kơtăn tơdjuôm ; kơdroh tơdroăng ki châi râ; Tơniăn ivá, mâu ƀok thái pơkeăng dêi kơvâ khăm pơlât ƀă troăng mơhnhôk tơdroăng ki veăng dêi pơlê pơla vâ kum roh tơplâ ton xŏn ƀă pơreăng COVID-19.

‘’Ngin pâ thế thăm mơdêk ivá khăm ngăn. Má péa nếo cho ki rĕng pêi cheăng thế tơmiât tơdroăng pơlât Hngêi pơkeăng pơtân tâk dâng sap ing 4 troh 5 rơpâu to xoăng pơlât, klêi mê ngin veăng a Hngêi pơkeăng cheăm ki troh lâp lu môi tiah lâi klêi mê mâu troăng klâ kơtăn F1 môi tiah lâi vâ ví tâ tú ăm dêi pó ƀă ai mâu tơdroăng pơchân tối vâ Khu xiâm ngăn pơkeăng ƀă khăm pơlât ƀă Chin phuh thăm rôe pơtroh vaccine vâ pâk ăm kuăn pơlê kong pơlê Dak Lak’’.

Kong pơlê Dak Lak dế thâ pêi pro hên mâu troăng vâ chôa ‘lâng mơdât pơreăng COVID-19 xông tâ tú tung pơlê pơla. Pakĭng hnoăng dêi khu râ kăn pơkuâ, mâu râ, kơvâ cheăng ki tơdjâk, rêm ngế kuăn pơlê kal pêi tiô mâu troăng hbrâ, mơdât pơreăng tro ƀă tơdroăng ‘’rêm ngế kuăn pơlê cho môi ngế lêng’’ tung ‘’tơdroăng tơplâ’’ mơdât pơreăng vâ rĕng mơdât pơreăng ƀă vêh ƀă tơdroăng rê ối ‘’tiah hmâ nếo’’.

Nam Trang rah chêh

A Sa Ly tơplôu ƀă tơbleăng