VOV4.XơĐăng - Dak Lak kô mơ-eăm mơhnhôk mâu khu râ vâ rak ngăn ăm mâu ngế kơtiê, tŏng kum mơngế kơtiê châ tơdah têt tŭm. Kố cho môi tung mâu tơdroăng xiâm châ Măt trâ̆n Tơnêi têa Việt Nam kong pơlê Dak Lak mơhnhôk a hneăng hôp mơgêi tơdroăng pêi cheăng hơnăm 2021, pêi pro Tơdroăng tơrŭm môi tuăn tơdroăng pêi cheăng hơnăm 2022 tơkŭm po lơ 28/12. Tiô tơbleăng a hneăng hôp, tung hơnăm hiăng hluâ, Viƀan Măt trâ̆n Tơnêi têa Việt Nam mâu râ kong pơlê Dak Lak hiăng thăm pơtâng tối, mơhnhôk kuăn pơlê pêi pro mâu troăng hbrâ mơdât pơreăng COVID-19.

Kong pơlê Dak Lak kô mơ-eăm vâ rêm ngế kuăn pơlê, ki má lối cho mơngế kơtiê châ tơdah têt tŭm

Mơhnhôk ƀă tơkŭm tơdah kơxô̆ liăn lối 35,3 rơtal liăn, mâu tơmeăm khăm pơlât ƀă mâu tơmeăm ki kal xúa rêm hâi veăng tơlo tŏng kum ăm tơdroăng hbrâ mơdât pơreăng COVID-19 a kong pơlê. Jâ H’ Kim Hoa Ƀyă, Kăn pơkuâ pơtâng tối mơhnhôk kuăn pơlê kơvâ cheăng Đảng kong pơlê, Kăn hnê ngăn Viƀan Măt trâ̆n Tơnêi têa Việt Nam kong pơlê Dak Lak tối ăm ‘nâi, ƀă mâu tơdroăng pá puât xua tơdjâk râ ó dêi pơreăng COVID-19, tung la ngiâ, Măt trâ̆n mâu râ kô pơtối mơhnhôk mâu khu râ vâ tŏng kum kơdroh pá puât ăm mơngế kơtiê ƀă mâu ngế ki ôh tá ai ivá tung pơlê pơla. A ngiâ cho mơ-eăm rak ngăn vâ rêm ngế kuăn pơlê, ki má lối cho mơngế kơtiê châ tơdah Têt tŭm.

A Sa Ly tơplôu ƀă tơbleăng