VOV4.Sêdang - Mơdât mot lo 4 to thôn pơlê, pêi pro séa ngăn têa môh ƀă tâi tâng kuăn pơlê vâ mơnhên F0, F1, mơdêk tơdroăng ki pâk vaccine ƀă mâu ngế hơnăm hiăng hên, Pơlê kong kơdrâm Ƀuôn Ma Thuột, kong pơlê Dak Lak dế rĕng hbrâ mơdât tíu ki ai pơreăng COVID-19 ki nếo châ ‘nâi a cheăm Ea Kao. 

Pâk vaccine ƀă séa ngăn têa môh ăm tâi tâng kuăn pơlê tung kơpong ki mơdât mot lo a cheăm Ea Kao, Ƀuôn Ma Thuột

Klêi kơ’nâi châ ‘nâi 2 ngế tâ tâ COVID-19 tung pơlê pơla a cheăm Ea Kao a hâi lơ 29/9, kơvâ ngăn pơkeăng ƀă khăm pơlât Pơlê kong kơdrâm Ƀuôn Ma Thuột, kong pơlê Dak Lak hiăng rĕng tí tăng, vê hdró kơpong ki ai ngế tâ vâ mơdât mot lo ƀă mâu ƀuôn Čư̆ Bông, Tơng Jŭ, Čư̆ Lim ƀă thôn Cao Thắng. Pơtroh khu ki séa ngăn têa môh va rĕng châ ‘nâi mâu ngế F0, F1 vâ djâ lăm pơlât, klâ ăm ối krê khăm pơlât mâu F1.

Khu rơxế ki lăm khăm pơlât, séa ngăn vâ hbrâ, tơplâ, mơdât pơreăng a cheăm Ea Kao

Riân troh kơxo lơ 1/10, a Ea Kao hiăng tôe ngăn têa môh ƀă 3.500 ngế kuăn pơlê,mơnhên ai 18 ngế tâ COVID-19. Tung kong măng lơ 30/9, a ƀuôn Tơng Jŭ ai tơ’nôm 30 ngế test rĕng ăm ‘nâi yương tĭnh. Nôkố, mâu têa môh ki toê xo mê hiăng châ pơtroh lăm séa ngăn RT-PCR.

Katarina Nga tơplôu ƀă tơbleăng