VOV4.Xơ Đăng - Kơxo lơ 21/12, a cheăm tơkăng kong Ia Lốp, tơring Ea Súp, kong pơlê Dak Lak, teăng mâ Khu pơkuâ ngăn mố đô̆i gak tơkăng kong dêi kong pơlê tơrŭm ƀă khu kăn pơkuâ cheăm, mâu khu ki ai hiâm mơno hơ-ui tơkŭm po tơdroăng ki hiăng mơjiâng pro klêi hngêi pơkeăng cheăm khu lêng ƀă kuăn pơlê tơrŭm; tŏng kum tơdroăng rêh ối cheăng ƀă diâp kế tơmeăm, khăm pơlât hbru pơkeăng tê kơtê ăm kuăn pơlê kơpong tíu tơkăng kong.

Dak Lak: Mơjiâng pro klêi hngêi pơkeăng kơpong tơkăng kong, khăm pơlât, hbru tơmeăm ăm kuăn pơlê a tíu tơkăng kong

Kố cho tơdroăng pêi pro tơbâ 77 hơnăm hâi mơjiâng khu lêng kuăn pơlê Việt Nam ƀă hâi mơdĭng gak kring tâi tâng kuăn pơlê lơ 22/12. Tiô Thươ̆ng tă Phạm Minh Tuyên, kăn phŏ pơkuâ Khu pơkuâ ngăn mố đô̆i gak tơkăng kong Dak Lak, nôkố tíu pêi cheăng rak vế tíu tơkăng kong xŏn 73 km, ƀă 4 to cheăm ối tung 2 tơring Ea Súp ƀă Ƀuôn Đôn, vâ chê 42% pơ’leăng mâ kuăn pơlê cho hdroâng kuăn ngo.

Tung hnoăng cheăng kum kuăn pơlê, mơjiâng krá rơdêi tung hiâm mơno kuăn pơlê, Khu pơkuâ ngăn mố đô̆i gak tơkăng kong Dak Lak hiăng tơkŭm po hên tơdroăng tŏng kum rêh ối pơlê pơla, tŏng kum mơnhông cheăng kâ ƀă rak ngăn ivá ăm kuăn pơlê.

Katarina Nga tơplôu ƀă tơbleăng