VOV4.Sêdang - Klêi kơ’nâi Pơlê kong kân Hồ Chí Minh ƀă mâu kong pơlê peăng Hdroh pro pơhôi tơdroăng ki mơdât prôk lăm, sap ing hâi lơ 2 troh lơ 4 khế 10, kong pơlê Dak Lak hiăng tơdah vâ chê 7 rơpâu ngế kuăn pơlê vêh sap ing mâu kong pơlê peăng Hdroh. Tung pơla tơbleăng séa ngăn test rĕng kháng nguyên ăm mâu kuăn pơlê ki tối a kơpêng mê hiăng ‘nâi ai 14 ngế yương tĭnh.

Kăn sat gâk troăng prôk djâ troăng ăm kuăn pơlê vêh dêi ngi pơlê

Tung kơxô̆ vâ chê 7 rơpâu ngế kuăn pơlê a mâu kong pơlê peăng Hdroh hmôu pơ vêh xêh ngi kong pơlê Dak Lak, troh kơxo lơ 4/10, kơvâ ngăn pơkeăng ƀă khăm pơlât Dak Lak hiăng tơbleăng khu ki pâk xo têa môh test rĕng kháng nguyên ăm lối 6 rơpâu ngế. Ing mê hiăng ‘nâi ai 14 ngế yương tĭnh, ƀă kơxô̆ châ 0,2%.

Mâu têa môh ki kố hiăng châ pơtroh CDC kong pơlê ƀă Viện vệ sinh dịch tễ Tây Nguyên séa ngăn tối nhên Realtime RT-PCR. Klêi kơ’nâi klâ xoăng kuăn pơlê, tung lối 7 rơpâu ngế vêh ngi kong pơlê ai vâ chê 60% ngế hiăng pâk vaccine hbrâ mơdât COVID-19 trum má 1; kơxô̆ ngế hiăng pâk trum má 2 châ lối 9%; ƀă 764 ngế F0 hiăng châ pơlât prêi COVID-19 châ lo ing hngêi pơkeăng, châ lối 11%.

Katarina Nga tơplôu ƀă tơbleăng