VOV4.Xơ Đăng - Tung pơla hdrối kố nah, Măt tơnêi têa rêm râ a kong pơlê Dak Lak hiăng tơbleăng hên tơdroăng pêi pro ai pơxúa vâ mơhnhôk rêm khu râ, rơxông kuăn pơlê rơtế tơdjuôm ivá veăng hbrâ, tơplâ mơdât pơreăng. Ing mê, veăng kum rơtế ƀă khu kăn Đảng, khu kăn pơkuâ ƀă tâi tâng kuăn pơlê hbrâ mơdât pơreăng, rak vế ivá ăm pơlê pơla.

Klêi môi pơla kâng kơxái mơdât ôh tá ăm lo pa gong vâ pêi tơdroăng hbrâ mơdât pơreăng COVID-19, tơdroăng rêh ối dêi vâi krâ nhŏng o a ƀuôn Tơng Jú, cheăm Ea Kao, pơlê kong kơdrâm Ƀuôn Ma Thuột hiăng vêh tơniăn tiah hmâ nếo, teăm mot tung rơnó krí kơphế. Jâ H’Yam ɃKrông, Kăn pơkuâ ƀuôn Tơng Jú hơ’muăn, drêng apoăng khế 10, drêng pơlê ai mâu ngế tro tâ COVID-19 châ hrĭng ngế tro tâ, lâp pơlê lối 440 rơpŏng, 2.200 pơ’leăng mâ mơngế thế ôh chiâng prôk lo pa gong, klâ kơtăn.

Kơnôm tơdroăng tơdjuôm ivá, tŏng kum dêi mâu khu râ, mâu kơvâ cheăng, mâu khu ki lăm tŏng kum mơngế pá puât, pêi cheăng hôm păng ‘nâng dêi tôh mơdât COVID pơlê pơla, vâi krâ nhŏng o hmiân tuăn klâ kơtăn, pêi kơtăng mâu pơkâ hbrâ mơdât pơreăng. Tơdroăng rŭm môi tuăn, môi tuăn dêi kuăn pơlê hiăng kum pơlê mơdât pơreăng, djâ tơdroăng rêh ối vêh tiah hmâ.

‘’Sap ing râ kong pơlê troh râ cheăm, ai mâu khu ki tŏng kum mơngế pá puât, mâu ngế tŏng kum mơngế pá puât đi đo tŏng kum vâi krâ nhŏng o tung pơla klâ kơtăn. Tôh mơdât COVID pơlê pơla dêi pơlê ai 17 ngế pêi cheăng kơhnâ păng ‘nâng, mơ-eăm tâi ivá kum ăm vâi krâ nhŏng o ing ôu kâ klêi troh pêi cheăng kâ môi tiah păn chu, ro mê tôh mơdât COVID xuân pêi tâi tâng troh tui lui, xua mê vâi krâ nhŏng o hmiân tuăn ối a hngêi. Nôkố vêh tơniăn tiah hmâ xuân thế pơtâng tối, pơchân tối vâi krâ nhŏng o tung pêi thế pêi pro tơtro tơdroăng hbrâ mơdât pơreăng’’.

Vi ƀan Măt trâ̆n Tơnêi têa cho tíu tơdah tơdroăng tŏng kum hbrâ mơdât COVID-19

Tung lâp kong pơlê Dak Lak, mâu tôh COVID pơlê pơla a mâu thôn, pơlê, tôh kơphô̆ hiăng rơtế mâu khu ki djâ troăng ahdrối, khu ki pleăng hnoăng cheăng veăng hbrâ mơdât pơreăng. Troh nôkố kong pơlê xuân rak 4.218 tôh mơdât COVID pơlê pơla a 15 tơring, pơlê kong krâm, pơlê kong kơdrâm, ki xiâm cho mâu kăn ƀô̆ mât trâ̆n, khu râ cheăm. Hnoăng cheăng xiâm dêi mâu tôh cho séa ngăn mâu ngế troh ing kơpong ai pơreăng, tơdroăng klâ kơtăn a hngêi, pơtâng tối mơhnhôk kuăn pơlê pêi pro tơtro mâu pơkâ ‘na hbrâ, mơdât pơreăng.

Jâ H’Kim Hoa Ƀyă, Kăn pơkuâ mơhnhôk pơtâng tối kuăn pơlê, Kăn hnê ngăn Vi ƀan Măt trâ̆n Tơnêi têa Việt Nam kong pơlê Dak Lak tối ăm ‘nâi, pakĭng pêi pro tơtro mâu tơdroăng cheăng a kơ koan, măt trâ̆n mâu râ ối mơnhông hnoăng tung tơdroăng kơbông krếo, mơhnhôk mâu khu râ ăm tơdroăng hbrâ mơdât pơreăng tung pơlê pơla; pêi pro mâu troăng pêi rơkê kố, troăng pêi tơmiât rơkê vâ tŏng kum ăm mâu khu ki veăng hbrâ mơdât ki xiâm:

‘’Mơnhông mơdêk hiâm mơno tŏng kum dêi pó tung pơlê pơla, ki rơhêng vâ tối cho mâu rơpŏng kuăn pơlê ƀă ngế krê xuân hiăng pôu râng hnoăng cheăng tâ tung tơdroăng hbrâ mơdât pơreăng. Má péa nếo, xuân hiăng ai hên tơdroăng tŏng kum, veăng kum môi tiah mâu roh hmê kâ tuăn pâ lơ mâu roh hmê kâ 0 liăn. Rêm ngế kuăn pơlê xuân hiăng hlê plĕng hên tâ tung tơdroăng hbrâ mơdât COVID, kum ăm khu râ kăn pơkuâ tung tơdroăng mơhnhôk mâu khu râ vâ veăng kum ăm mâu kơpong klâ kơtăn xuân môi tiah mâu tíu gak mơdât pơreăng ƀă mâu tíu kâng kơxái mơdât ôh tá ăm mot lo pa gong’’.

Măt trâ̆n Tơnêi têa mâu râ kong pơlê Dak Lak hiăng mơnhông hnoăng rŭm môi tuăn, tơkŭm kuăn pơlê veăng hbrâ mơdât pơreăng

Pôa Phạm Minh Tấn, Kăn phŏ pơkuâ hnê mơhno má môi Đảng kong pơlê Dak Lak mơnhên, Măt trâ̆n Tơnêi têa mâu râ kong pơlê Dak Lak hiăng mơnhông mơdêk hnoăng tơrŭm môi tuăn tơkŭm mâu râ kuăn pơlê tung veăng hbrâ mơdât pơreăng COVID-19 a kong pơlê. Klêi kơ’nâi troăng pêi dêi măt trâ̆n, troh nôkố kong pơlê hiăng tơdah ing mâu tíu cheăng, khu tơrŭm cheăng, khu tê mơdró, mâu ngế ai hiâm mơno tŏng kum tâi tâng kơxô̆ liăn lối 34,5 rơtal liăn; 10.000 kơxuô tơmeăm kum pơlê pơla, 200.000 to ƀô̆ kit test rĕng COVID 19.

Măt trâ̆n Tơnêi têa mâu râ xuân hiăng mơhnhôk ƀă pơtroh hrĭng tâ̆n tơmeăm kâ vâ tŏng kum ăm kuăn pơlê a mâu kơpong tro kâng kơxái mơdât ôh tá ăm lo pa gong ƀă tŏng kum mâu khu hbrâ, mơdât pơreăng.

‘’Măt trâ̆n Tơnêi têa hiăng pêi pro tơtro tơdroăng kố, ƀă troăng kơbông krếo veăng tơlo tơmeăm khoăng vâ kum kuăn pơlê trâm pá. Tĭnh ủy, khu râ kăn pơkuâ mâu râ, khu râ kăn pơkuâ hnê ngăn cheăng Đảng ƀă tá khu cheăng kal kí pơrá mơnhên mâu tơdroăng châ tơ-ƀrê kân dêi Măt trâ̆n Tơnêi têa tung pơla kố nah. Pin loi tơngah khât mơnhông mơdêk ivá ó rơdêi rŭm môi tuăn tâi tâng hdroâng mơngế mơni pin kô troh tah pơreăng kân COVID-19’’.

Mơnhông mơdêk hnoăng tơrŭm môi tuăn, tơkŭm kuăn pơlê, Măt trâ̆n Tơnêi têa mâu râ kong pơlê Dak Lak xuân dế thăm veăng kum hên khu râ kăn pơkuâ rak ngăn, tŏng kum kuăn pơlê. Tơdroăng môi tuăn, tơrŭm ƀă hlê plĕng dêi rêm ngế kuăn pơlê tung pơlê pơla kô mơjiâng ivá ó rơdêi vâ rơtế mơdât, troh tah pơreăng, rĕng djâ tơdroăng rêh ối vêh tiah hmâ.

H’Xíu H’Mok chêh

A Sa Ly tơplôu ƀă tơbleăng