VOV4.Xơ Đăng - Hâi lơ 8/10, Kŏng an pơlê kong kơdrâm Ƀuôn Ma Thuột, kong pơlê Dak Lak hiăng pơkâ xăm tối ngế pro xôi, pêi pro luât mơdât ôh tá ăm lo ing tíu rêh ối ƀă Đỗ Thanh Hải, 36 hơnăm, ối a bêng Tân Lợi, pơlê kong kơdrâm Ƀuôn Ma Thuột, kong pơlê Dak Lak. Hải tro xăm tối vâ pơxâu phak xua tơdroăng ‘’Pro tâ tú pơreăng ki rơ-iô ăm kuăn mơngế’’ tiô Khoăn 1, troăng 240 Khu luât xôi kân. Tiô séa ngăn dêi kŏng an, Đỗ Thanh Hải cho pơkuâ a Ƀơrô hngêi rơxế Tiến Oanh, ối a kơxô̆ 134 Hai Bà Trưng, bêng Thắng Lợi, pơlê kong kơdrâm Ƀuôn Ma Thuột.

Kơmăng lơ 10/7, Hải rơtế 2 ngế ki ê to tung rơxế kân pơto tơmeăm krâ kơxô̆ 50H-052.70 ing Pơlê kong kân Hồ Chí Minh vêh a pơlê kong kơdrâm Ƀuôn Ma Thuột. Drêng kố, Pơlê kong kân Hồ Chí Minh cho kơpong ai pơreăng. Drêng vêh a tíu pêi cheăng hngêi rơxế, Hải ôh tá troh hngêi pơkeăng pêi pro tơdroăng tối tơbleăng ăm ƀok thái pơkeăng tiô pơkâ, mê hiăng lăm prôk hên tíu tung pơlê kong kơdrâm Ƀuôn Ma Thuột ƀă trâm mâ hên ngế.

Klêi kơ’nâi khăm ngăn yương tĭnh, mê Hải xuân ối ôh tá tơbleăng tối ăm ƀok thái pơkeăng tơdrăng khât troăng prôk pro tơdroăng ti tăng xiâm kối, mơnhên tíu tâ tú pơreăng dêi khu cheăng trâm hên pá puât. Tơdroăng séa ngăn rah khăm, Kŏng an mơnhên Đỗ Thanh Hải hiăng pro 10 ngế ki ê a pơlê kong kơdrâm Ƀuôn Ma Thuột tro tâ tú COVID-19. Kơ koan cheăng dế pro kêi đeăng hô sơ, pơxâu phâk ngế pro xôi tiô pơkâ dêi luât.

A Sa Ly tơplôu ƀă tơbleăng