VOV4.Sêdang - Klêi kơ’nâi 28 hâi pơlât COVID 19 a Hngêi pơkeăng pơlât kơ-o lo mơheăm ƀă Pơlât xôu kong pơlê Dak Lak, hâi lơ 24/9, ngế tro tâ pơreăng Y.N.N (91 hơnăm, ối a ƀuôn Drao, cheăm Čư Né, tơring Krông Ƀuk, kong pơlê Dak Lak) hiăng lo hngêi pơkeăng. Ngế tro tâ pơreăng kố ai tơdroăng châi tung châ mơheăm kơtâu têi ƀă châi xôu ki râ. Klêi kơ’nâi pơlât, ngế tro tâ pơreăng Y.N.N thế pơlât hiâm ƀă oxy tung môi pơla ton. Ngế tro tâ pơreăng Y.N.N cho ngế hên hơnăm má môi tro tâ pơreăng châ hlo troh nôkố dêi kong pơlê Dak Lak hiăng prêi lĕm COVID-19.

Ngế tro tâ pơreăng 91 hơnăm lo ing hngêi pơkeăng

Kố cho tơdroăng ki phiu ro dêi ngế tro tâ pơreăng, nhŏng o ngế tro tâ pơreăng mê ối cho tơdroăng mơ-eăm kân kĕng dêi kơvâ khăm pơlât kong pơlê Dak Lak tung tơdroăng hbrâ, mơdât ƀă rak ngăn, pơlât mâu ngế tro tâ COVID-19. Xêo troh 16 chôu hâi lơ 24/9, kong pơlê Dak Lak hiăng châ hlo 1745 ngế tro tâ COVID-19, tung mê ai 1.183 ngế châ pơlât prêi.

A Sa Ly tơplôu ƀă tơbleăng