VOV4.Sêdang - Tơdroăng ăm ‘nâi sap ing Khu ngăn pơkeăng ƀă khăm pơlât kong pơlê Dak Lak kơxê lơ 26/10, kơvâ ngăn pơkeăng ƀă khăm pơlât kong pơlê dế trâm pá tung tơdroăng ki roê mâu túa pơkeăng ƀă kế tơmeăm xúa tung khăm pơlât kum ăm tơdroăng khăm, pơlât ăm mâu ngế ki tro pơreăng, malối cho ngế ki tâ SARS-CoV-2. Xiâm kối dêi tơdroăng kố cho xua hên khu ki xo ôh tá châ pơtroh hồ sơ ki veăng xo xua tíu pơtroh kơthô ôh tá pêi cheăng, mâu hngêi rơxế ôh tá kơtâu, hên kŏng ti ki veăng xo ối tung kơpong ki tro mơdât mot lo, klâ krê mê ôh tá châ pro hồ sơ veăng.

Dak Lak: Ôh tá tŭm pơkeăng ƀă tơmeăm xúa tung khăm pơlât kum ăm tơdroăng pơlât mâu ngế tâ COVID-19

Hlo ai tơdroăng kố, Khu ngăn pơkeăng ƀă khăm pơlât kong pơlê Dak Lak hiăng chêh pro hlá mơéa pâ thế Vi ƀan hnê ngăn kong pơlê Dak Lak pâ thế Khu xiâm ngăn pơkeăng ƀă khăm pơlât, Chin phuh tŏng kum, xoăng pơkeăng ƀă kế tơmeăm xúa tung khăm pơlât tơdrêng ăm kong pơlê vâ kum ăm hnoăng cheăng khăm, pơlât ăm mâu ngế ki tâ pơreăng. Tơdjâk troh pơreăng COVID-19 a Dak Lak, riân sap ing 16 chôu hâi lơ 25/10 troh 16 chôu hâi lơ 26/10, lâp kong pơlê ‘nâi ai 150 ngế tâ SARS-Cov-2. Pơlê kong kơdrâm Ƀuôn Ma Thuột xuân cho tíu ki ‘nâi ai hên ngế tâ tâ tung pơlê pơla.

Katarina Nga tơplôu ƀă tơbleăng