VOV4.Xơ Đăng - Dak Lak hrá tơdroăng ki hơ’lêh ing Zero COVID troh tơdroăng ki rêh ối tơniăn tung pơla ai pơreăng, mê cho rơkong tơpui tối dêi Tiê̆n sih Cao Hưng Thái, Kăn pơkuâ ngăn khu xiâm khăm pơlât, cheăng tung khu xiâm ngăn ‘na pơkeăng ƀă khăm pơlât dêi tơnêi têa drêng lăm pôu pêi cheăng ƀă Vi ƀan hnê ngăn kong pơlê Dak Lak. ‘Na tơdroăng pâk pơkeăng, mê kong pơlê hiăng tơdah xo vâ chê 13 hdroh vaccine ing Khu xiâm ngăn ‘na pơkeăng ƀă khăm pơlât tơnêi têa, tâi tâng vâ chê 1 rơtuh 700 rơpâu klŏng; troh nôkố châ pâk vâ chê 1 rơtuh 500 rơpâu klŏng, tung mê, pâk trum má 1 châ 90,9% ăm pơ’leăng mâ mơngế ki 18 hơnăm tơngi klêng, trum má péa  châ 21,1%.

Tiê̆n sih Cao Hưng Thái xông tơpui a hneăng hôp

Xông tơpui a chôu phut pêi cheăng mê, Tiê̆n sih Cao Hưng Thái, Kăn phŏ pơkuâ ngăn ‘na khăm pơlât tối thế kong pơlê Dak Lak kal athế rĕng pâk pơkeăng vaccine ăm kuăn pơlê, rĕng ai troăng hơlâ vâ hbrâ mơdât pơreăng COVID-19; mơhnhôk thế mâu khu pơkuâ ngăn hngêi pơkeăng krê veăng tơplâ mơdât pơreăng; thâ rĕng pơkuâ djâ tơdroăng cheăng, khăm pơlât mâu ngế ki F0, mơjiâng pro hngêi pơkeăng ukố umê, mơjiâng tíu xiâm ki hbrâ mơdât pơlât pơreăng; thăm mơdêk tơdroăng seá ngăn pơreăng tiô túa Realtime-PCR. Tơdrêng amê, thăm mơdêk tơdroăng hnê tối ăm kuăn pơlê pơtối rak vế, pêi pro tiô tơdroăng pơkâ 5K ƀă hên mâu tơdroăng ki ê.

Gương tơplôu ƀă tơbleăng