VOV4.Xơ Đăng - Tơdroăng ăm ‘nâi sap ing Khu hnê mơhno cheăng hbrâ mơdât pơreăng COVID-19 dêi kong pơlê, riân troh nôkố, kong pơlê Dak Lak hiăng tơdah xo 12 rôh hbru vaccine hbrâ mơdât pơreăng COVID-19 sap ing Khu xiâm ngăn pơkeăng ƀă khăm pơlât ƀă lối 1.230 rơtuh klŏng tung tâi tâng kơxô̆ lối 2,7 rơtuh klŏng ki rơhêng vâ, ăm lối 1,4 rơtuh klŏng ăm mâu ngế ki kal (lối 18 hơnăm) a kong pơlê.

Riân troh hâi lơ 8/11, lâp kong pơlê Dak Lak hiăng pâk vâ chê 1 rơtuh 128 rơpâu klŏng vaccine, tung mê, pâk trum má 1 ai lối 993 rơpâu klŏng, châ lối 70% ƀă pâk trum má 2 lối 128 rơpâu klŏng, châ 9%. Ai 5/15 pơlê cheăm râ tơring pâk trum má lối 80%, cho pơlê kong kơdrâm Ƀuôn Ma Thuột (84,8%), tơring Krông Ƀuk (84,7%), tơring Ea Hleo (86,7%), tơring Čư̆ Kuin (84,4%) ƀă pơlê kong krâm Ƀuôn Hồ (80,1%).

Dak Lak kal pak tơ’nôm lối 1 rơtuh 800 rơpâu klŏng vaccine vâ châ lap 80% kơxô̆ mơngế tung lâp kong pơlê châ pâk vaccine

Pôa Nay Phi La, kăn pơkuâ Khu ngăn pơkeăng ƀă khăm pơlât kong pơlê Dak Lak ăm ‘nâi: vâ rak tơniăn troh mơ’nui hơnăm 2021 Dak Lak mơni kô châ pâk lối 80% pơ’leăng mâ mơngế sap ing 12 hơnăm tơngi klêng, kong pơlê kal tơ’nôm 1 rơtuh 890 rơpâu klŏng, tung mê, tơdroăng ki kal châ pâk tung khế 11 kố lối 1 rơtuh klŏng ƀă khế 12 667.600 klŏng.

Katarina Nga tơplôu ƀă tơbleăng