VOV4.Sêdang - Kơxê lơ 9/9, kăn hnê ngăn Vi ƀan tơring Ea Hleo, kong pơlê Dak Lak ăm ‘nâi dế tơrŭm ƀă kơvâ cheăng khăm pơlât kong pơlê vâ pêi pro mâu tơdroăng pơkâ ‘na khăm pơlât drêng châ ‘nâi péa ngế ki rơkê cho kong têa ê troh a tơring kố vâ pêi pro tơdroăng tơkêa on tơhrik khía yương tĭnh ƀă SARS-CoV-2. Tiô pôa Nguyễn Văn Hà, kăn hnê ngăn Vi ƀan hnê ngăn tơring Ea Hleo, hâi lơ 6/9, khu ki hriăn rơkê kong têa ê tung mê ai 6 ngế lo ing Pơlê kong kân Hồ Chí Minh lăm troh a tơring vâ pro tơdroăng tơkêa on tơhrik khía. Klêi kơ’nâi troh a tơring, tá 6 ngế ki rơkê kố châ klâ ối krê a môi to hngêi kâ koi ối pơtê, rêm ngế ối môi to veăng.

Hâi lơ 8/9, Tíu xiâm ngăn pơkeăng pơlât tơring Ea Hleo pâk xo têa môh séa ngăn rĕng kháng nguyên mê ai 2 ngế tung 6 ngế ki kố ‘nâi yương tĭnh ƀă SARS-CoV-2. Mâu khu ki hriăn rơkê kố hiăng châ pâk péa trum vaccine COVID-19 ƀă hiăng châ klâ ối krê 14 hâi tiô pơkâ a Pơlê kong kân Hồ Chí Minh. CDC Dak Lak tối mơni 2 ngế ki kố tâ tú pơreăng ăm ngế ki ê gá iâ. Nôkố, mâu kơvâ cheăng ki ai tơdjâk dêi kong pơlê Dak Lak ƀă tơring Ea Hleo dế pêi pro mâu hlá mơ-éa ki kal vâ ăm 2 ngế ki kố lăm pơlât, tơdrêng amê hnối tơkŭm ăm ối krê ƀă mâu ngế ki u ối tiô pơkâ.

Katarina Nga tơplôu ƀă tơbleăng