VOV4.Sêdang - Vi ƀan tơring Ea Hleo, kong pơlê Dak Lak tối ăm ‘nâi, tơdroăng tơkêa bro Hngêi kơmăi on tơhrik kơtâu ƀă khía Ea Nam tung tơring hiăng kêi đeăng mơjiâng pro, bu ối pro rơnêi ‘na kih thuât kô tơniăn ‘mot on tơhrik a troăng kơxái on tơhrik tơnêi têa. Kố ôh tá xê to tơdroăng tơkêa bro on tơhrik kơtâu ƀă khía a tơnêi ki kân má môi lâp tơnêi têa, châ mơjiâng rĕng má môi, mê ối tơdâng pơxúa cheăng kâ ƀă rêh ối pơlê pơla.

Tơdroăng tơkêa bro Hngêi kơmăi on tơhrik kơtâu ƀă khía Ea Nam xua Grup pơkuâ Trung Nam pơkuâ mơ’no liăn cheăng, ai 84 trăng on tơhrik kơtâu ƀă khía, 1,2 km troăng kơxái 500KV, tâi tâng kơxô̆ liăn mơ’no 16.500 rơtal liăn, pêi pro tung 3 cheăm Ea Nam, Ea Khal ƀă Dliê Yang, tơring Ea Hleo. Tơdroăng tơkêa bro ai pơkâ mơ’no liăn a lơ 31/12/2020 ƀă hâi khế mơjiâng pro tung pơla ai pơreăng COVID-19 xông tâ tú ó.

Môi iâ dêi tơdroăng tơkêa bro hngêi kơmăi on tơhrik kơtâu ƀă khía Ea Nam

Mơhé ti mê, ƀă tơdroăng mơ-eăm tâi ivá dêi khu mơ’no liăn cheăng, mâu khu ki mơjiâng pro ƀă khu râ kăn pơkuâ, mâu khu râ tơring Ea Hleo ƀă kong pơlê Dak Lak, tơdroăng tơkêa bro hiăng kêi đeăng tâi tâng tơdroăng mơjiâng pro mê ôh tá ai tơdroăng ki trâm xía vâ ƀă tơxup tơbriât tơnêi ki lâi.

Tiô xêo ngăn dêi khu mơ’no liăn, drêng hiăng mơ’no on tơhrik, Hngêi kơmăi kơtâu ƀă khía Ea Nam kô mơjiâng lối 1,1 rơtal kWh/hơnăm. Tâng kơvâ on tơhrik rôe tâi tâng kơxô̆ on tơhrik kố, pêi lo liăn 1 hơnăm tiô tối hdrối châ dâng 94 rơtuh dollars, veăng kum tung liăn ngân dêi kong pơlê dâng 250 rơtal liăn.

A Sa Ly tơplôu ƀă tơbleăng