VOV4.Xơ Đăng - Khu ngăn chiâk deăng ƀă Mơnhông thôn pơlê kong pơlê Dak Lak hiăng tơkŭm po Rôh hôp mơgêi hơnăm 2021, tơbleăng hnoăng cheăng hơnăm 2022. Tiô tối tơbleăng a rôh hôp, hơnăm 2021, maluâ pơtối trâm hên xơpá xua pơreăng kân COVID-19, pơreăng tâ tú tung mơnăn mơnoâ xuân ối tâk hên, yă tê kế tơmeăm, tơdroăng ki tê kế tơmeăm pêi lo ing chiâk deăng tá hâi tơniăn la mâu tơdroăng pơkâ tơkŭm dêi kơvâ pêi chiâk deăng pơrá châ tiô pơkâ ƀă tơkâ luâ túa pơkâ.

Dak Lak pơkâ mơdêk 5,56% ăm kơvâ pêi chiâk deăng

Tung mê, ki kơnía dêi tâi tâng kế tơmeăm pêi lo ing chiâk deăng, loăng pơlái, ká xi xŏng tâk vâ chê 4% tâng vâ pơchông ƀă hơnăm 2020; pêt kong châ lối 146% túa pơkâ; pơreăng tâ tú a hdrê loăng pêt, mơnăn păn châ hbrâ mơdât; kơxô̆ cheăm pêi klêi thôn pơlê nếo lối 46%. Mâu tơdroăng ki pêi pro kố hiăng veăng kum kal khât tung mơdêk ƀă mơnhông cheăng kâ rêh ối tơdjuôm dêi kong pơlê.

Tiô Khu ngăn ‘na chiâk deăng ƀă Mơnhông thôn pơlê kong pơlê, hơnăm 2022 Dak Lak pơtối mơ-eăm mơdêk tơdroăng ki vêh pêt mâu kế tơmeăm, pơkâ mơ’no ƀă pêi pro ƀă tơdroăng pơkâ mơdêk 4,56%.

Katarina Nga tơplôu ƀă tơbleăng