VOV4.Sêdang - Hâi lơ 28/10, kong pơlê Dak Lak châ hlo tơ’nôm 126 ngế tro tâ COVID-19, tung mê ai troh 39 ngế châ hlo tung pơlê pơla. 126 ngế nếo tro tâ COVID-19 ƀă 39 ngế châ hlo tung pơlê pơla a kong pơlê Dak Lak tơkŭm ki hên a mâu tơring Čư Mgar, Krông Ƀuk, pơlê kong krâm Ƀuôn Hồ ƀă pơlê kong kơdrâm Ƀuôn Ma Thuột. Kố xuân cho mâu tơring, pơlê kong krâm châ hlo hên má môi ngế tro tâ tung pơlê pơla tung 1 măng tĭng hiăng hluâ ƀă mâu ngế tro tâ ki hên tơdjâk troh ing kuăn pơlê vêh ing kơpong ai pơreăng mâu kong pơlê peăng Hdroh tơnêi têa.

A pơlê kong kơdrâm Ƀuôn Ma Thuột pơtối châ hlo hên ngế tro tâ COVID-19 tung pơlê pơla. Kơvâ ngăn pơkeăng ƀă khăm pơlât dế mơ-eăm rah khăm ngăn vâ mơdât pơreăng xông tâ tú

Hên cheăm, bêng a mâu tơring kố hiăng mơdêk râ rĕng ing râ má 1, râ má 2 to râ má 3, râ má 4, mê cho ing ngiât, trĭng to khêi iâ, khêi. Kơvâ ngăn pơkeăng ƀă khăm pơlât kong pơlê Dak Lak dế mơ-eăm séa ngăn, ti tăng mâu ngế tro tâ pơreăng, pêi pro klâ kơtăn ƀă tôe xo têa môh khăm ngăn mâu ngế ki tro tơdjâk, ối achê ƀă mâu ngế tro tâ pơreăng, châ hlo F0 pa kong pơlê pơla.

Tơdjâk troh tơdroăng pơreăng COVID-19 a Dak Lak xông tâ tú ó, hâi lơ 28/10, Vi ƀan kong pơlê Dak Nông hiăng ai mơ-éa ki thâ pơkâ sap hâi lơ 29/10, kăn ƀô̆ ƀă mơngế pêi cheăng a Dak Nông ôh tá prôk troh lơ vêh a Dak Lak tung 14 hâi, pakĭng ai tơdroăng pêi cheăng ki kal lơ châ tơdroăng môi tuăn dêi kơ koan ai hnoăng.

A Sa Ly tơplôu ƀă tơbleăng