VOV4.Xơ Đăng - Kong pơlê Dak Lak dế nôkố ai lối 209 rơpâu ha kơphế, tâng vâ riân ngăn rêm hơnăm châ lối 500 rơpâu tâ̆n kơphế, cho tơmeăm ki pêi lo liăn ngân hên má môi dêi lối hrĭng rơpâu rơpŏng. Vâ hbrâ mơdât tơdroăng ki ai khu ngế tong kơphế, kring vế tơniăn tơmeăm khoăng dêi mơngế ki pêt kơphế, mâu kơ koan, khu râ, kơvâ cheăng ƀă khu ngăn thôn pơlê a kong pơlê kố dế pơkâ pêi pro krâu kơhnâ khât ‘na hnoăng cheăng ki mê.

Pái roh môi măng tĭng klêi kơ’nâi kâ hmê kơxê măng, pôa Trương Văn Đệ, thôn 3, cheăm Ea Kpam, tơring Čư Mgar pơtối hbrâ ếo hơtô, chêng khŏng bô-rô-xô, muâk, on tiê ƀă hía hé tơrŭm rơtế mâu khu tôh ki pơkuâ xêh thôn lăm séa ngăn gak kring chiâk deăng kơphế. Pôa Đệ tối, chiâk deăng kơphế dêi rơpŏng a mơ’nui thôn 3, hơngế kơpong kuăn pơlê rêh ối xua mê tơ’lêi tro tong.

Xua mê, sap apoăng khế 10, drêng plâi kơphế pơxiâm krâ, khu pơkuâ xêh tôn hiăng lăm séa ngăn, rak ngăn.

‘’Hơnăm nah, hngêi á tro mơngế ‘mêi tong dâng 40 xiâm kơphế, tâi tâng mê lối 20 kơxâk kơphế. Xêo tro tong, rơpŏng mung mơngế rĕng lăm krí, laga xua plâi kơphế tá hâi tum tâi pro pơ’leăng kơphế kơdroh hên. Mơngế ‘mêi krí tong ối đôu hên tơkâng, thăm nếo râng kơnêp pôe tơkâng plâi, pro tơdjâk troh rơnó kơ’nâi. Hơnăm kơ’nâi châ nhŏng tôh pơkuâ xêh thôn tŏng kum gak mê ôh tá ai xêo tơdroăng ki tong kơphế, rơpŏng hngêi á tơkôm kơphế tum tâi mê nếo krí’’.

Lâp cheăm Ea Kpam ai lối 1.200 ha kơphế, kân rơdâ troh tơkăng kong pơlê kong kơdrâm Ƀuôn Ma Thuột ƀă pơlê krâm Ƀuôn Hồ. Thiê̆u tă Lưu Quang Chiến – Kăn pơkuâ Kŏng an cheăm Ea Kpam, tơring Čư M’gar tối ăm ‘nâi, a mâu ƀăng kơphế ki tơkăng, mâu ngế ‘mêi hmâ lăm tong krí, pro chiâng ôh tá tơniăn, pro tro lŭp tơmeăm ăm kuăn pơlê. Hơnăm kố, kŏng an cheăm tơrŭm ƀă mâu khu râ, kơvâ cheăng, mâu râ mơjiâng 8 tôh pơkuâ xêh a tâi tâng mâu thôn, pơlê, pêi pro tơdroăng séa ngăn xua mê kơphế dêi kuăn pơlê hiăng châ tơniăn.

‘’Kŏng an cheăm hiăng tơbleăng mâu pơkâ pêi pro troh rêm tôh ki pơkuâ xêh ƀă mâu tôh djâ troăng ahdrối vâ pêi pro tơdroăng séa ngăn a kơmăng a mâu kơpong chiâk deăng ki rơhĭng rơhối hmâ ai tơdroăng ki tong kơphế vâ mơdât. Tơdrêng amê, tơkŭm po tơbleăng tơdroăng, um tung mâu trang zalo, facebook dêi cheăm, tơring ‘na troăng pêi, troăng ki vâ tăng tong dêi khu tong tơmeăm vâ vâi krâ kơtăng.

Séa ngăn khu ngế ki nếo lo ing kroăng phak, đi đo lăm tong hơ’vĕng tơmeăm vâ hnê, pât djâ prôk troăng lĕm, ing mê mâu ngế ki kố ôh tá pro tơdroăng xôi xếo’’.

Kong pơlê Dak Lak nôkố ai lối 209 rơpâu ha kơphế, kơxô̆ pơ’leăng kơphế rêm hơnăm châ lối 500 rơpâu tâ̆n

Kong pơlê Dak Lak nôkố ai lối 209 rơpâu ha kơphế, pêi lo lối 500 rơpâu tâ̆n, xua mê rêm roh mot rơnó krí, pơrá kal hên ngế vâ gak. Tiô thươ̆ng tă Nguyễn Văn Qúy – Phŏ pơkuâ Kan sát rup mơngế xôi kân Kŏng an kong pơlê Dak Lak, rơtế ƀă mâu tôh ki pơkuâ xêh a pơlê, kŏng an kong pơlê pêi pro mâu troăng lăm pêi cheăng, vâ rup mâu khu ki tong tơmeăm pêi lo ing chiâk deăng, ‘mâi pơ’lêh tơdroăng rôe, tơniăn gak kring a kong pơlê.

‘’Ƀơrô Kan sát rup mơngế xôi kân Kŏng an kong pơlê xing xoăng mâu ngế pêi cheăng lăm troh mâu tơring ai tơdroăng tong tơmeăm pêi lo ing chiâk deăng ki hên vâ tơrŭm ƀă mâu tơring, pơlê krâm, pơlê kong kơdrâm tơkŭm séa ngăn, xut tah, rup mâu khu ngế ki lăm tong tơmeăm apoăng rơnó krí xo tơmeăm. Tơkŭm po pơtâng tối mơdêk tơdroăng hlê plĕng rak vế tơmeăm kuăn pơlê; hbrâ pơkuâ tơtro mâu ngế ki nhôm pro xôi; pơchân tối mâu khu pơkuâ tiú rôe tơmeăm pêi lo ing chiâk deăng, ôh tá rôe tơmeăm pêi lo ing chiâk deăng ôh tá ai xiâm kối ki nhên’’.

Tuấn Long chêh

A Sa Ly tơplôu ƀă tơbleăng