VOV4.Xơ Đăng - Pêi pro tơdroăng pơkâ dêi Khu pơkuâ ngăn Đảng kong pơlê Dak Lak, sap ing hơnăm 2004 troh nôkố ai 1.194 kơ koan, khu pơkuâ cheăng a Dak Lak hiăng tơrŭm pro nhŏng o ƀă 758 to pơlê hdroâng kuăn ngo. Klêi kơ’nâi vâ chê 17 hơnăm tơrŭm, ƀă mâu tơdroăng ki tŏng kum ai pơxúa kal, ngiâ méa mâu pơlê, cheăm rế hía rế hơ’lêh, tơdroăng rêh ối dêi kuăn pơlê châ mơdêk, kơxô̆ rơpŏng kơtiê kơdroh. Tuấn Long, ngế chêh hlá tơbeăng ai ƀai chêh ‘na tơdroăng kố dêi Kŏng ti On tơhrik Dak Lak ƀă Kơ koan Rơ’jiu Việt Nam kơpong Tây Nguyên ƀă mâu pơlêki tơrŭm pro nhŏng o.

            Ngin rơtế kăn ƀô̆, nhân viên Kŏng ti On tơhrik Dak Lak troh lăm pôu pơlê pro nhŏng o a ƀuôn M’briu, cheăm Čư Né, tơring Ea Kar. Roh kố, đoân viên Kŏng ti diâp ki pâng rơkong môh, têa kơdê pơreăng, tơmeăm kâ, ƀă pơtâng tối mâu troăng hbrâ, mơdât pơreăng COVID-19 ăm kuăn pơlê. Rơtế ƀă mê, kăn teăng mâ Khu pơkuâ Kŏng ti xuân diâp péa to ro hdrê kơnâ 40 rơtuh liăn ăm péa rơpŏng kơtiê a pơlê.

Đoân viên Kŏng ti on tơhrik Dak Lak diâp kơxuô tơmeăm ăm kuăn pơlê hbrâ mơdât pơreăng

            Pôa Y Suk Niê – Kăn pơkuâ hnê ngăn chi ƀô̆ ƀuôn M’Briu, cheăm Čư Né tối, mâu hơnăm hdrối tơdroăng rêh ối dêi kuăn pơlê a tung pơlê ối trâm hên pá puât, kơxô̆ rơpŏng kơtiê ối hên, châ tơmâng tŏng kum mơ’no liăn cheăng dêi Đảng ƀă Tơnêi têa, tơdroăng tŏng kum dêi kơ koan ki pro nhŏng o, nôkố kơxô̆ kố kơdroh a kơlo pá kơdâm 5%. Tung roh pơreăng COVID-19 a mơ’nui khế 9/2021, pơlê tơdah 146 ngế pêi cheăng kâ hơhngế a mâu kong pơlê, pơlê kong kân peăng hdroh vêh ví pơreăng, mâu khu râ kơvâ cheăng kong pơlê ƀă Kŏng ti on tơhrik Dak Lak hiăng troh tŏng kum.

            ‘’Kŏng ti On tơhrik Dak Lak pro nhŏng o ƀă ƀuôn M’briu sap hơnăm 2004 ƀă ai hên tơdroăng tŏng kum. Kŏng ti đi đo tơmâng kơ-êng, diâp kơxuô tơmeăm a mâu roh trung thu, leh, têt; tŏng kum ăm kuăn pơlê ‘na hngêi ối, phái ví tơdroăng kơklêa drêng tá hâi troh rơnó pôe xo lơ diâp ro ăm rơpŏng kơtiê. Chôa ‘lâng kơxô̆ rơpŏng kơtiê tung pơlê kơdroh hên. Roh pơreăng kố vâi troh diâp ki pâng rơkong môh, têa kơdê pơreăng; pơtâng tối ăm vâi krâ nhŏng o hbrâ mơdât pơreăng lơ pêi tiô kơtăng mâu troăng pêi 5K dêi Khu xiâm ngăn pơkeăng ƀă khăm pơlât, diâp ki pâng rơkong môh, ôh tá tơkŭm kơdrâm mơngế. Kuăn pơlê pêi pro tơtro xua mê troh nôkố pơlê tá hâi ai ngế F0’’.

Teăng mâ khu râ kăn pơkuâ Kŏng ti on tơhrik Dak Lak diâp ro ăm rơpŏng kơtiê a ƀuôn M’briu

            Ƀuôn M’briu, cheăm Čư Né, tơring Ea Kar nôkố ai 268 rơpŏng ƀă lối 1.300 pơ’leăng mâ mơngế, lối 95% cho mơngế Rơđế. Pôa Trần Văn Thuận – Kăn pơkuâ Kŏng ti on tơhrik Dak Lak tối ăm ‘nâi, tiô Pơkâ dêi Tĭnh ŭy Dak Lak, hơnăm 2004 kŏng ti hiăng pro nhŏng o ƀă ƀuôn M’briu. Vâ tŏng kum pơlê pro nhŏng o, rêm hơnăm a mâu roh leh, têt, kŏng ti tơkŭm po lăm pôu kơ-êng, mơhnhôk, diâp kơxuô tơmeăm ăm rơpŏng kơtiê, rơpŏng ai hnoăng tơnêi têa; mơjiâng mâu tơdroăng ki nhên tŏng kum kuăn pơlê mơnhông mơdêk cheăng kâ, xăm kơklêa kơdroh kơtiê.

            ‘’Tiô tơdroăng pro nhŏng o rêm hơnăm mê kŏng ti hiăng mơ’no mâu pơkâ pêi rêm hơnăm tơdroăng tŏng kum rêh ối pơlê pơla ƀă tơmâng troh mâu rơpŏng ai hnoăng tơnêi têa, rơpŏng pá puât vâ mơnhông mơdêk cheăng kâ. Ƀă ƀuôn M’briu mâu tơdroăng pá puât nôkố a pơlê mê kŏng ti  hiăng ‘nâi vâ mơ’no mâu tơdroăng vâ tŏng kum tơtro ƀă kuăn pơlê tung pơlê môi tiah mơjiâng pơlê mơhno túa lĕm tro’’.

Kăn teăng mâ kŏng đoân VOV – Tây Nguyên diâp tơmeăm kâ ăm ƀuôn B’hôk tro kâng kơxái mơdât ôh tá ăm mot lo pakong

            Ƀuôn B’hôk, cheăm Yang Tao, tơring Lắk xuân pro nhŏng o ƀă Kơ koan Rơ’jíu Việt Nam kơ koan teăng mâ a kơpong Tây Nguyên – VOV- Tây Nguyên sap hơnăm 2004. Pơlê nôkố ai vâ chê 270 rơpŏng ƀă lối 1.000 pơ’leăng mâ mơngế, ki hên cho mơngế M’nông. Tiô pôa Y Mor Kuăn – kăn pơkuâ ƀuôn B’hôk, sap ing pro nhŏng o VOV – Tây Nguyên đi đo rơtế, tŏng kum kuăn pơlê tung pơlê. Rơtế ƀă kơ-êng, diâp kơxuô tơmeăm a mâu roh leh, têt, VOV Tây Nguyên hiăng mơhnhôk mâu khu tê mơdró mơjiâng diâp ăm 5 toăng hngêi tuăn pâ kơnâ 400 rơtuh liăn ăm mâu rơpŏng kơtiê, rơpŏng ai hnoăng tơnêi têa. Drêng pơreăng COVID-19 xông tâ tú a mơ’nui khế 9/2021, pơlê tơdah vâ chê 200 ngế pêi cheăng kâ hơhngế vêh a pơlê vâ ví pơreăng, tung kơxô̆ kố ai hên ngế yương tĭnh, klêi mê lâp pơlê tro kâng kơxái mơdât ôh tá ăm lo pakong, teăng mâ VOV – Tây Nguyên hiăng chu tŏng kum kuăn pơlê.

            ‘’Ƀuôn B’hôk tro kâng kơxái mơdât ôh tá ăm mot lo pakong 14 hâi, ôh tá châ prôk lăm, ôh tá ai tŭm hên tơmeăm ki kal xúa rêm hâi. Kơ koan ki pro nhŏng o VOV – Tây Nguyên troh diâp ăm rêm rơpŏng 10 kilô phái, 1 kung kếo têa rơmâ, 1 kơxuô ƀôt ngot, têa măm, ká khăng; rơtế ki pâng rơkong môh, têa kơdê pơreăng ƀă hía hé. Kuăn pơlê phiu ro ‘nâng. Ai tơ’nôm tơmeăm kâ vâ hbrâ mơdât pơreăng, kuăn pơlê hmiên tuăn tơkâ hluâ pá puât drêng klâ kơtăn’’.

Kăn teăng mâ VOV-Tây Nguyên diâp kơxuô tơmeăm têt ăm vâi krâ kuăn pơlê a pơlê pro nhŏng o ƀuôn B’hôk

            Vũ Nam Trang, ngế chêh hlá tơbeăng VOV – Tây Nguyên tối ăm ‘nâi, tung roh pơreăng hơnăm 2021, rơtế ƀă tơdroăng veăng kum dêi Khu pơkuâ Kŏng đoân kơ koan ối mơhnhôk mâu khu ki tŏng kum mơngế pá puât tŏng kum kơvâ khăm pơlât Dak Lak 200 rơtuh liăn rôe tơmeăm khăm pơlât, pơkeăng kum tung hbrâ, mơdât pơreăng; diâp vâ chê 5 tâ̆n tơmeăm kâ ăm kuăn pơlê a pơlê pro nhŏng o ƀuôn B’hôk tung pơla tro kâng kơxái mơdât ôh tá ăm mot lo pakong.

            ‘’Ƀă hnoăng cho ngế chêh hlá tơbeăng mê ngin thăm pêi pro tơdroăng kơbông krếo mâu khu tŏng kum mơngế pá puât ƀă veăng mơ’no ivá dêi tơná vâ tŏng kum ăm kuăn pơlê a kơpong hơhngế hơhngo, kơpong tro kâng kơxái mơdât ôh tá ăm mot lo pakong xua pơreăng kân COVID-19. Xuân mơhúa cho mâu ngế ki tŏng kum mơngế pá puât đi đo hbrâ rơnáu rơtế khu chêh hlá tơbeăng ngin vâ troh mâu tiú kơpong kâng kơxái mơdât ôh tá ăm lo pakong, kơpong hơhngế hơhngo vâ diâp kơxuô tơmeăm ăm kuăn pơlê tro tơdjâk xua pơreăng COVID-19’’.

            Vâ chê 17 hơnăm hiăng hluâ, ƀă tơdroăng tŏng kum dêi Kŏng ti on tơhrik Dak Lak ƀă VOV – Tây Nguyên, péa pơlê ki pro nhŏng o ƀuôn M’briu ƀă ƀuôn B’hôk hiăng ai pơhlêh nhên, tơdroăng rêh ối chôa ‘lâng tơtêk, ki rơhêng vâ tối cho drêng pơreăng COVID-19 xông tâ tú ó./.

Tuấn Long chêh

A Sa Ly tơplôu ƀă tơbleăng