VOV4.Sêdang - Vi ƀan hnê ngăn kong pơlê Dak Lak nếo tơbleăng ăm pêi pro mơ-éa ‘na tơdroăng tơkŭm po hnê hriâm sap ing hâi lơ 4/10/2021. Pơtối mê, ƀă mâu tơring, cheăm châ mơnhên ‘’kơpong ngiât’’, a râ mâm non ăm phêp ăm vâi hdrêng 5 hơnăm châ troh hngêi trung vâ hriâm tâp laga cô ƀă vâi hdrêng pơrá dế ối a ‘’kơpong ngiât’’; mâu rơxông hơnăm ki ê pơtối châ pơtê hriâm troh drêng ai ttơbleăng nếo.

Hok tro râ má môi a Ƀuôn Ma Thuột hriâm mơ'no tơdrêng tung um tiô troăng măng Internet

 Ƀă mâu tơring, cheăm ‘’kơpong trĭng’’, ‘’kơpong trĭng khêi’’, ‘’kơpong khêi’’, pơtối (hnê hriâm tiô troăng mơ’no tung um ing măng Internet, um tơvi, hnê mơhno pơcháu ƀai a hngêi). Khu pơkuâ hnê hriâm ƀă hnê mơjiâng tuăn ngôa rơkê kong pơlê Dak Lak pơkuâ, tơrŭm ƀă Khu pơkuâ ngăn pơkeăng ƀă khăm pơlât, Vi ƀan mâu tơring, pơlê krâm, pơlê kong kơdrâm hnê mơhno mâu tíu hnê hriâm pơtối tối tơbleăng ăm thái cô, kăn ƀô̆, mâu ngế pêi cheăng ƀă hnê mơhno nôu pâ, hok tro pêi pro kơtăng mâu troăng hbrâ, mơdât pơreăng COVID-19; tơdrêng amê hbrâ ai troăng đi đo hbrâ rơnáu tâng ai pơreăng xông tâ tú a tíu pêi cheăng.

A Sa Ly tơplôu ƀă tơbleăng