VOV4.Xơ Đăng - Drêng ai pơreăng COVID-19 dế pơtối tâ tú ó tiah dế pơla kố, ai lối hrĭng ngế sinh viên kơvâ pơkeăng a kong pơlê Dak Lak hiăng chêh dêi inâi vâ veăng tơplâ mơdât pơreăng, rơtế veăng ƀă khu ƀok thái pơkeăng pêi pro mâu tơdroăng tôe xo têa môh, pâk pơkeăng, khăm pơlât mơngế tamo châi xua tro tâ pơreăng COVID-19.

Vâ chê 2 khế hdrối kố nah, sinh viên Trần Ngọc Hải ƀă mâu khu sinh viên ki pleăng dêi hnoăng cheăng khoa Y Dược, hngêi trung Đăi hok Tây Nguyên veăng tŏng kum hnoăng cheăng hbrâ mơdât pơreăng a Tíu xiâm ngăn pơkeăng pơlât pơlê kong kơdrâm Ƀuôn Ma Thuột, kong pơlê Dak Lak. Rêm hâi pêi cheăng dêi khu cho pơxiâm sap ing 7 chôu 30 phut kơxo ƀă ton troh 23 chôu kong măng, thăm nếo ai mâu hâi ki ‘nâ athế troh 4 chôu kơxo má hâi kơ’nâi nếo pơtê.

Tơdroăng cheăng dêi vâi cho klâ xoăng túa, pâk xo têa môh rơkong séa ngăn ƀă chêh ‘mot inâi tung kơmăi. Trần Ngọc Hải tối, ‘nâi tơdroăng Khu ngăn pơkeăng ƀă khăm pơlât mơhnhôk thế sinh viên veăng tŏng kum hbrâ mơdât pơreăng COVID-19, ngoh hiăng chêh inâi veăng ƀă hiăng 2 hdroh lăm troh a kơpong ki ai pơreăng.

“Á chêh inâi veăng tung tơdroăng ki hbrâ mơdât pơreăng hiăng châ 2 xôh, rôh ki apoăng á lăm troh a Bình Dương, klêi mê châ vêh ƀă kố á chêh inâi lăm troh a pơlê kong kơdrâm Ƀuôn Ma Thuột. Á hlo tiah kố, cho môi ngế sinh viên kơvâ ngăn pơkeăng mê á athế chêh inâi lăm hbrâ mơdât pơreăng vâ tơnêi têa rĕng tâi pơreăng, ƀă á pleăng dêi hnoăng hơnăm ối nếo dêi tơná to lâi ăm tơnêi têa mê á pleăng to mê”.

Rơtế ƀă mâu khu ki ê, mâu sinh viên kơvâ ngăn pơkeăng a Dak Lak dế kơhnâ hâi măng tŏng kum hbrâ mơdât pơreăng

Xuân môi tiah Trần Ngọc Hải, sap ing khế 6 nah troh nôkố hiăng ai lối hrĭng ngế sinh viên kơvâ ngăn pơkeăng a Dak Lak chêh inâi veăng tung tơdroăng tŏng kum hbrâ mơdât pơreăng. Rơtế ƀă tơdroăng ki tŏng kum ăm kong pơlê Bình Dương, sinh viên ki pleăng dêi hnoăng cheăng ối châ xing xoăng tŏng kum a Tíu xiâm ngăn pơkeăng ƀă khăm pơlât pơlê kong kơdrâm Ƀuôn Ma Thuột, Tíu xiâm séa ngăn châi tamo kong pơlê, mơdêk tŏng kum hnoăng cheăng séa ngăn pơreăng, chêh ‘mot inâi tung kơmăi, séa ngăn pơreăng COVID-19, tŏng kum séa ngăn rĕng ăm kuăn pơlê tung mâu kơpong ki mơdât mot lo ƀă hên ki ê.

Tơkâ luâ mâu tơdroăng ki xơpá tơbrêi tơbrêh dêi tơdroăng cheăng ƀă tơdroăng xâu rơ-iô kô tro tâ pơreăng tâ tú, mâu sinh viên pơrá hlo phiu ro ƀă hâk tơngăm xua tơná hiăng veăng kum môi iâ hnoăng cheăng tung tơdroăng ki hbrâ mơdât pơreăng COVID-19. Kố cho rôh vâ rêm ngế sinh viên châ xúa ki hlê plĕng tơná xuân môi tiah hriâm ƀối hên tơdroăng ki rơkê plĕng ai khât ăm tơdroăng cheăng tung xo ah hmôi.

Mâu sinh viên ki pleăng dêi hnoăng cheăng kơvâ ngăn pơkeăng châ pơtroh vâ tŏng kum Tíu xiâm ngăn pơkeăng pơlât pơlê kong kơdrâm Ƀuôn Ma Thuột

Sinh viên Nguyễn Thị Thanh Nga, Khoa Y Dược, hngêi trung Đăi hok Tây Nguyên tối:

“Sap ing apoăng drêng Khu ngăn pơkeăng ƀă khăm pơlât ƀă hngêi trung krếo thế mâu khu ki veăng hbrâ mơdât pơreăng mê á chêh inâi veăng vâ tŏng kum ƀă mâu vâi ngoh nâ peăng kơvâ ngăn pơkeăng, riân troh nôkố xuân hiăng châ 4 khế. Á xuân rơhêng vâ châ veăng kum môi iâ ivá dêi tơná vâ kum pơlê kong kơdrâm hbrâ mơdât pơreăng mê rơhêng vâ Dak Lak xuân môi tiah Ƀuôn Ma Thuột rĕng kâi hbrâ mơdât pơreăng”.

Ƀă hiâm mơno kơhnâ dêi hơnăm ối nếo, mâu sinh viên ki pleăng dêi hnoăng cheăng pơrá pêi cheăng kơtăng ƀă pôu râng dêi hnoăng. Tơdroăng kơhnâ dêi vâi châ kuăn pơlê hlo ƀă mơnhên tối khât. Jâ Nguyễn Thị Thanh Hương, ngế ki pơkuâ ƀuôn Alê A, bêng Ea Tam, pơlê kong kơdrâm Ƀuôn Ma Thuột ăm ‘nâi:

“Tung pơla hdrối kố nah pơlê ai mâu sinh viên hngêi trung Đăi hok Tây Nguyên troh veăng tơrŭm tro, kơhnâ, krâu ƀă pôu râng dêi hnoăng cheăng cho môi ngế sinh viên. Tối tơdjuôm tơdroăng ki tơrŭm pơla pơlê ƀă mâu sinh viên xuân hlo tơtro khât. Hdrối sinh viên troh mê á xuân hiăng tơpui ƀă sinh viên vâ rêm ngế ‘nâi tíu test rĕng cho a tíu lâi. Mâu vâi o troh xêh ƀă tối tơdjuôm cho rơkê tơtro, kơhnâ pêi tâi ivá tơná kum kuăn pơlê”.

Khu sinh viên dêi hngêi trung Đăi hok Tây Nguyên lăm tŏng kum ăm kong pơlê Bình Dương hbrâ mơdât pơreăng

Maluâ trâm hên mâu tơdroăng ki rơ-iô la mâu sinh viên kơvâ ngăn pơkeăng a Dak Lak xuân hâi măng veăng rơtế ƀă khu ngăn pơkeăng ƀă khăm pơlât pêi dêi hnoăng cheăng hbrâ mơdât pơreăng. Vâi púi rơhêng vâ veăng kum dêi tơná kô kum rĕng kâi hbrâ mơdât pơreăng vâ tơná vâi xuân môi tiah mâu ƀok thái pơkeăng dế pêi dêi hnoăng cheăng rĕng châ vêh dêi ƀă rơpŏng hngêi; mâu kơpong ngiât, kơpong tơniăn kô rế hía rế châ po rơdâ ƀă tơdroăng rêh ối kô rĕng châ vêh tiah hmâ.

Drêng pơreăng xuân dế tâ tú rơ-iô, mê ƀă hiâm mơno ƀă hnoăng cheăng pôu râng dêi hnoăng, mâu sinh viên kơvâ ngăn pơkeăng xuân ối pơtối djâ troăng ahdrối pleăng dêi hnoăng cheăng vâ tŏng kum hbrâ mơdât pơreăng. Sinh viên Nguyễn Đức Duy, Khoa Y Dược, hngêi trung Đăi hok Tây Nguyên tối nhên:

“Tung la ngiâ ah tâng pơreăng xuân ối pơtối ôh tá tơniăn mê á xuân ối veăng hbrâ mơdât pơreăng. Drêng veăng mê á xuân rơhêng vâ á chiâng vâ kum môi iâ ivá dêi tơná vâ kum hbrâ mơdât pơreăng rĕng kâi châ mơdât vâ pin châ vêh tiah hmâ tung tơdroăng rêh ối cheăng kâ”.

Sap ing rôh pơreăng COVID-19 rôh má 4 tâ tú troh nôkố, kong pơlê Dak Lak hiăng mơhnhôk vâ chê 800 ngế sinh viên, kăn ƀô̆ ƀă mâu ngế cheăng sap ing mâu hngêi trung đăi hok tung kong pơlê vâ tŏng kum mâu khu ki hbrâ mơdât pơreăng. Ƀă ivá hơnăm ối nếo, hiâm mơno djâ troăng ahdrối, tơkâ luâ mâu tơdroăng xơpá, tơbrêi tơbrêh ƀă rơ-iô, mâu sinh viên kơvâ ngăn pơkeăng hiăng kơhnâ mơhnhôk mâu tơdroăng ki rơkê plĕng ‘na hnoăng cheăng dêi tơná ki hiăng châ hriâm, veăng rơtế ƀă mâu kăn ƀô̆, mâu ngế cheăng ‘na khăm pơlât pêi pro hnoăng cheăng.

H’Xíu HMok chêh

Katarina Nga tơplôu ƀă tơbleăng