VOV4.Sêdang - Rơnó krí kơphế hơnăm 2021 – 2022 hbrâ mot tung rơnó krí khât, Dak Lak kal hrĭng rơpâu ngế vâ krí. Laga, tung rơnó pơreăng COVID-19 xuân dế xông tâ tú ó mê tơdroăng prôk lăm mơngế pêi cheăng vâ tơniăn tŭm ngế krí kơphế, tơniăn mơdât pơreăng, dế cho tơdroăng ki rơhêng vâ ‘nâi plĕng dêi kuăn pơlê pêi chiâk deăng ƀă khu râ kăn pơkuâ a Dak Lak. Tiô tơbleăng dêi Khu pơkuâ ‘na pêi chiâk deăng – Mơnhông mơdêk thôn pơlê Dak Lak, rơnó krí kơphế hơnăm 2021 – 2022, Dak Lak ai lối 209 rơpâu ha, ƀă châ lối 500 rơpâu tâ̆n.

Dak Lak tô tuăn ôh tá tŭm ngế krí kơphế tung pơla pơreăng kân xông tâ tú

Vâ tơniăn tơdroăng krí kơphế rơnó nếo châ tơ'lêi hlâu, mâu tơring kal hbrâ troăng mơhnhôk mâu ngế krí kơphế ăm tơtro ƀă tơdroăng mơdât pơreăng drêng pơreăng xông tâ tú. Vi ƀan kong pơlê pơcháu Khu pơkuâ ‘na pêi chiâk deăng pơkuâ, tơrŭm ƀă mâu khu, kơvâ cheăng rĕng ‘nâi tơdroăng, tơkŭm pêi pro, hnê mơhno Vi ƀan mâu tơring, pơlê krâm, pơlê kong kơdrâm mơjiâng troăng krí kơphế tơniăn, châ tơƀrê.

A Sa Ly tơplôu ƀă tơbleăng