VOV4.Xơ Đăng - Hâi lơ 22/11, a Tíu xối tơbâ tơnêi têa Hngêi phak Ƀuôn Ma Thuột, khu pơkuâ ngăn Đảng, Hô̆i đong hnê ngăn, Vi ƀan hnê ngăn, Vi ƀan Măt trâ̆n Tơnêi têa Việt Nam kong pơlê Dak Lak hiăng tơkŭm po leh chôu nhâng tơbâ 81 hơnăm Hâi mơjiâng Đảng ƀô̆ kong pơlê Dak Lak hâi lơ (23-11-1940 – 23-11-2021).

Mâu kăn pơkuâ kong pơlê Dak Lak chôu nhăng, tơbâ mâu ngoh khên tơnôu

A leh tơbâ, mâu kăn hiăng rơtế ƀă dêi rơpó hơ’muăn tối mâu tơdroăng ton nah khên tơnôu dêi Đảng ƀô̆ kong pơlê Dak Lak tung 81 hơnăm mơjiâng, mơnhông ƀă xông tơtêk. Sap ing mơ’nui hơnăm 1940, Chi ƀô̆ Đảng kŏng san ki apoăng a Dak Lak châ mơjiâng a Hngêi phâk Ƀuôn Ma Thuột, troh nôkố Đảng ƀô̆ Dak Lak ai 20 đảng ƀô̆ ối tung kong pơlê, lối 700 khu tơrŭm Đảng, ƀă lối 83 rơpâu ngế đảng viên.

A leh chôu nhâng tơbâ 81 hơnăm Hâi mơjiâng Chi ƀô̆ Đảng ki apoăng a Dak Lak, teăng mâ kăn pơkuâ Đảng ƀô̆ ƀă kuăn pơlê mâu hdroâng kuăn ngo tung kong pơlê tối khŏm mơ-eăm mơdêk khôi hmâ khên tơnôu, pơtối hơ’lêh nếo ó rơdêi ‘na ki hlê plĕng ƀă pêi pro, po mâu tơdroăng ki hiăng ai hlâu, ai pơxúa, mơdêk rơdêi mơnhông cheăng kâ rêh ối pơlê pơla, mơjiâng Dak Lak rế hía rế kro lĕm, khôi túa lĕm tro.

Katarina Nga tơplôu ƀă tơbleăng