VOV4.Xơ Đăng - Kơxê lơ 27/12, Khu ngăn mơhno túa lĕm tro, ivá ƀă ôm hyô kong pơlê Dak Lak tơkŭm po hôp ƀă mâu khu mơdró kâ ôm hyô vâ tơpui ‘na mâu tơdroăng ki tơ’mot tơmối, ‘mâi mơnhông kơvâ ôm hyô klêi kơ’nâi mâu hâi khế tro pơtê xua tơdjâk ing pơreăng kân COVID-19. Tiô tơdroăng tơbleăng a rôh hôp, hơnăm 2021, Ôm hyô Dak Lak tro tơdjâk ó khât xua COVID-19. Kơxô̆ tơmối troh a kong pơlê bu dâng 414 rơpâu ngế; tâi tâng kơxô̆ liăn châ xo sap ing ôm hyô tiô riân bu châ 355 rơtal liăn, kơdroh tơdế tâng vâ pơchông ƀă hơnăm 2020.

Ôm hyô tí tăng ‘nâi plĕng ‘na pro kơphế hưh cơ Akŏ Tam - Ƀuôn Ma Thuột

Vâ ‘mâi mơnhông ôm hyôm, Vi ƀan hnê ngăn kong pơlê Dak Lak hiăng pơkâ, troăng hơlâ rak vế tơniăn ‘na hbrâ mơdât pơreăng COVID-19; pêi pro tŏng kum, pơkâ tơleăng vâ khu mơdró kâ ôm hyô rĕng vêh tơniăn, rế hía rế ‘mâi mơnhông. Kong pơlê kô pơkâ mơdêk, mơđah tơbleăng ôm hyô ƀă mâu kong pơlê môi tiah Khánh Hòa, Đà Nẵng ƀă mâu tơdroăng kế tơmeăm ki mơhnhôk ôm hyô. Mơdêk khât ki dêi lĕm dêi kế tơmeăm ƀă yă tê tơtro.

Katarina Nga tơplôu ƀă tơbleăng