VOV4.Xơ Đăng - Kơxê lơ 19/11, Vi ƀan xiâm Măt trâ̆n Tơnêi têa Việt Nam kong pơlê Dak Lak hiăng tơdah xo 1,5 rơtal liăn sap ing mâu tíu ki veăng tơlo kum ăm hnoăng cheăng hbrâ mơdât pơreăng COVID-19, tung mê ai 1,2 rơtal liăn mâ ƀă 1 rơpâu hnoăng pơkeăng pơlât mâu ngế ki tro COVID-19 kơnâ 300 rơtuh liăn. Vi ƀan xiam Măt trâ̆n Tơnêi têa Việt Nam kong pơlê Dak Lak ăm ‘nâi, nôkố tơdroăng pơreăng COVID-19 a kong pơlê dế tâ tú rơ-iô, kơxô̆ ngế tâ pơtối tâk rêm hâi, hiăng tâk troh lối 6.600 ngế, tung mê ai vâ chê 2.500 ngế dế pơlât.

Ƀă tơdroăng veăng kum ing mâu tíu pêi cheăng, mâu Kăn Măt trâ̆n tơnêi têa  rêm râ kong pơlê kal thế tơrŭm ƀă Khu xiâm ngăn pơkeăng pơlât xing xoăng ăm mâu tíu pêi cheăng, hngêi pơkeăng ƀă mâu tíu xiâm pơlât COVID - 19 vâ ai tiô tơdroăng púi vâ pơkeăng pơlât ăm mâu kơpong pơlât mâu ngế tâ COVID-19.

Katarina Nga tơplôu ƀă tơbleăng