VOV4.Xơ Đăng -  A pơlê kong kơdrâm Buôn Ma Thuột, Khu xiâm ngăn pơkeăng kong pơlê Dak Lak hiăng tơdah xo 5 toăng rơxế pâk vaccine ki lăm prôk pâk ukố umê xua Kŏng ti veăng tơlo liăn ôtô THACO Trường Hải veăng kum ‘na tơdroăng cheăng hbrâ mơdât pơreăng COVID-19 ki dế tâ tú rơ-iô a kong pơlê kố. Rơxế châ hriăn bro ai tiô púi vâ pơkâ tơdroăng lăm pâk tơniăn, tơ-brê a mâu kơpong ki prôk lăm xơpá, hlối xuá ‘na tơdroăng khăm ngăn COVID-19. Tung rơxế ai hbrâ mâu kơthung ‘măn rak vaccine ƀă mâu kơmăi râk ăm tô hngíu rak tơniăn vaccine.

            Pôa Nay Phi La, Kăn pơkuâ ‘na ngăn pơkeăng ƀă khăm pơlât tơdah rơxế ing tíu cheăng pơcháu ăm

Khu xiâm ngăn ‘na pơkeăng Dak Lak ăm ‘nâi: tung 1 rơtuh 362 rơpâu 326 ngế ki sap 18 hơnăm tơngi klêng, kong pơlê Dak Lak nếo pâk vaccine hbrâ mơdât COVID-19 trum má 1 nếo châ 64% ƀă trum má péa châ 9,41%. Vâ mơdât pơreăng tâ tú rơ-iô, Dak Lak kal thế mơdêk pâk vaccine. Xua mê tơdroăng kum 5 toăng rơxế lăm pâk vaccine ki lăm pâk ukố umê cho kal khât, kum kong pơlê rĕng cha pâk tâi a mâu kơpong hơngế hơngo mâu kơpong kuăn pơlê ki  ối hơngế hngêi pơkeăng.

Gương tơplôu ƀă tơbleăng