VOV4.Sêdang - Vâ mơdêk rơdêi mâu tơdroăng ki pleăng dêi hnoăng cheăng xua vâ kum pơlê pơla pêi pro troh mâu phô̆m vâ xông kân, mâu vâi hdrêng ƀă kuăn pơlê ki ai tơdroăng rêh ối xơpá tung kong pơlê, hơnăm ối nếo Dak Lak tơbleăng tơdroăng ki pleăng hnoăng cheăng a rơnó hngíu ƀă hên tơdroăng pêi pro ai pơxúa kal. Tiah mê, rêm râ tung kong pơlê tơbleăng mơdêk rơdêi tơdroăng ki hnê tối hbrâ mơdât pơreăng COVID-19 ăm kuăn pơlê; mơhnhôk tơlo mâu kơxô̆ liăn vâ hbru lối hrĭng hnoăng kế tơmeăm ƀă ếo hơtô, pơkhom ăm hok tro kơtiê, diâp mâu hnoăng liăn pơxiâm vâ pêi cheăng ăm droh rơtăm, tŏng kum droh rơtăm kơhnâ tơrŭm tung pơlê pơla.

Mâu tơmeăm hbru ăm  mâu kuăn pơlê ki xơpá xua tơdjâk pơreăng COVID-19

Khu pơkuâ ngăn Đoân droh rơtăm Dak Lak rah xo cheăm Ea Riêng, tơring MDrak vâ tơkŭm po tơdroăng râ kong pơlê ƀă diâp 50 hnoăng tơmeăm ăm mâu rơpŏng ki ai tơdroăng rêh ối xơpá, 10 toăng rơxế mái rơtế ƀă mâu pơkhom ki hơtô ƀă ếo hơtô ăm mâu vâi o hok tro ƀă hên ki ê. Tung tơdroăng kố, Khu pơkuâ ngăn Đoân droh rơtăm Dak Lak xuân hiăng pơxiâm mơjiâng pro 2 toăng hơ-ui ăm rơpŏng đoân viên droh rơtăm ki xơpá ‘na hngêi ối a tơring Krông Pač ƀă Ea Kar. Tâi tâng kơxô̆ liăn ‘no ăm tơdroăng râ kong pơlê ai lối 200 rơtuh.

Katarina Nga tơplôu ƀă tơbleăng