VOV4.Xơ Đăng - A kong pơlê Dak Lak, tơdroăng rêh ối tiah hmâ hiăng chiâng tơdroăng ki nếo ƀă mâu kuăn pơlê a mâu kopong ki tro tâ pơreăng COVID-19, xua hiăng kâi châ mơdât pơreăng, chía tơniăn, pơreăng hiăng châ mơdât. Tơdroăng châ mơdât mê hiăng kum ăm rêm ngế achê dêi pó tâ nếo ƀă ing mê ăm hlo tơdroăng ki kal git khât cho tơdroăng rak vế tơniăn dêi pó.

Klêi kơ’nâi 1 khế tâi tâng mơngế rơpŏng hngêi athế klâ ối kơtăn hơngế dêi pó, xua ai pơreăng tâ tú, nôkố hiăng châ tơkŭm nếo xua chía tâ iâ, hiăng châ mơdât pơreăng COVID-19. Ngoh Đỗ Văn Lực ối a ƀuôn Čuôr Dăng A, cheăm Čuôr Dăng, tơring Čư̆ Mgar hơniâp ro xua rơpŏng hiăng châ tơniăn. Ngoh Lực tối ăm ‘nâi, tung roh tâ tú pơreăng COVID-19 má 4, tung mê, ai 2 ngế on veăng pơrá athế klâ dêi pó xua tro tâ tú pơreăng, hiăng pro tơdroăng rêh ối hơ’lêh chiâng phá tơ-ê.

Kuăn pơlê hiăng vêh rêh ối - cheăng kâ tiah hdrối nah

Ki tô tuăn má môi 2 ngế kuăn ối tơxĭn dế hơnăm vâ xông kân, hơnăm ối hriâm xuân hiăng tro tâ pơreăng. Ki tô tuăn mê xua xâu kơ pơreăng, la xuân châ mơhúa tro tơdroăng châi tamo ôh tá râ, mâu ngế tung rơpŏng hngêi xuân môi tiah mê, tơdroăng rêh ối vêh châ tơniăn tiah hmâ hdrối nah nếo.

“Apoăng, mê cho tơdroăng ki tô tuăn, xua ngế ki lâi xuân tro tâ mê xuân xâu ó khât. Kơ’nâi mê, ƀok thái pơkeăng khăm pơlât, rak ngăn xuân hiăng hơlêm, mơhnhôk, hriâm pơtâp ivá châ chăn, ôu kâ tro tơdroăng, ivá mo dâi lĕm xuân kâi chiâng vâ tơkâ luâ. Rơpŏng á mơhúa drêng châ trâm vêh rêh ối tiah hmâ nếo”.

Xuân hiăng cho môi tung mâu pơlê cheăm ki tro tâ pơreăng a kong pơlê Dak Lak, nôkố tơdroăng rêh kâ ối dêi kuăn pơlê a cheăm Čư̆ Pui, tơring Krông Bông hiăng vêh tiah hmâ nếo. Pôa Y Bran Niê, ối a ƀuôn Khoă, cheăm Čư̆ Pui hơniâp ro drêng rơpŏng hngêi ai 6 tung 9 ngế cho F0, pơrá hiăng châ pơlât prêi lĕm.

Pôa Y Bran Niê tối ăm ‘nâi, xuân tô tuăn ‘na ivá châ chăn ƀă tơdroăng hlâ rêh, drêng tâi tâng hngêi rơpŏng ki tro klâ kơtăn mê pơrá ối khăm pơlât tro klăng tung rơnó pêi chiâk deăng, xua kơphế hiăng châ troh a rơnó krí xo; kơpôu ro kal ai mơngế lăm kơ’nêi. Xuân kơnôm khu kăn pơkuâ ngăn veăng tŏng kum, vâi krâ-nhŏng o hiăng krếo phôn mơhnhôk, êng, tơpui tơno, mâu ƀok thái pơkeăng hiăng kơhnâ tung khăm pơlât mê rêm ngế hiăng vêh mo lĕm ivá, châ chăn, tơniăn vâ vêh rêh ối tiah hmâ dêi tung rơpŏng hngêi. Loăng pêt, mơnăn păn xuân hiăng châ tŏng kum krâu khât:

“Rơpŏng tro F0 á tô tuăn, préa prŏng khât drêng rêm ngế rêm tíu cheăng pin ôh tá châ trâm, tơpui tơno ăm vâi ‘nâi vâ tŏng kum. Á hlo ing tơdroăng mê la xuân hiăng châ rak ngăn, khăm pơlât tơniăn, hmê kâ hiăng bê. Á vêh troh akố trâm rơpŏng hngêi tơniăn ó khât. Pin xuân ôh tá tô tuăn ki klâi xếo, xua rêm ngế hiăng prêi tâi tâng, mo lĕm châ ƀă hiăng pêi cheăng tơniăn”.

Kuăn pơlê a kơpong tro tâ pơreăng hiăng vêh rêh ối tiah hmâ

Tơring Krông Bông môi tung mâu tơring ki châ mơnhên tối ai kơdrâm mơngế tro tâ pơreăng COVID-19 tung pơlê pơla. Maluâ ti mê, troh nôkố ki hên hiăng prêi lĕm, tơniăn ăm rơpŏng hngêi pơtối tung pêi chiâk pêi deăng. Pôa Nguyễn Ngọc Pháp, Kăn phŏ hnê ngăn Vi ƀan tơring Krông Bông tối ăm ‘nâi: A mâu thôn pơlê hdrối nah tíu kố cho tíu ki tro tâ pơreăng mê nôkố hiăng ôh pá ai mơngế tâ tú tung pơreăng xếo.

Tơring hiăng vêh ối tung kơpong ngiât lĕm, la hiâm mơno kuăn pơlê đi đo hbrâ rơnáu, hlê plĕng nhên troăng hơlâ ki tơplâ mơdât pơreăng, maluâ tíu kố tíu ê xuân ối pơtối tâk hên.

“Khu hnê mơhno dêi tơring xuân hiăng pơkâ hnê tối ‘na tơdroăng tơkŭm hdró tíu ki klâ kơtăn. Ƀă mâu ngế ki tro F1, F2 hiăng teăm ăm vâi klâ ối krê. A mâu tíu ki mơdât prôk lăm hiăng kơdroh ki ti tơniăn, xua mê, Krông Bông hiăng rĕng châ mơdât pơreăng”.

Mâu hmê kơchâi ki xing xoăng ăm ngế ki klâ krê vâ hbrâ mơdât pơreăng COVID-19

Tiô tơdroăng ki riân ngăn dêi kơvâ pơkeăng ƀă khăm pơlât, kong pơlê Dak Lak riân troh hâi lơ 16/12, lâp kong pơlê hiăng mơnhên tối ai lối 9.700 ngế ki tro tâ pơreăng COVID-19, tung mê, ai lối 7 rơpâu ngế ki tamo châi hiăng châ pơlât prêi. Kong pơlê loi tơngah tiah kố, pơreăng COVID-19 dế rế hiá rế kâi châ mơdât, ƀă hiăng ăm pơtê môi toăng hngêi pơkeăng ki khăm pơlât pơtân, xua pá ai ngế tamo xếo. Hên tơring, cheăm tung kong pơlê, riân tá mâu kơpong ki hdrối nah cho tro tâ pơreăng hên, kơdrâm, la kuăn pơlê hiăng châ khăm pơlât dâi khât, kơhnâ khât ƀă nôkố pơrá hiăng châ vêh rêh ối tiô tơdroăng tiah hmâ ki nếo.

Tuấn Anh chêh

Nhat Lisa tơplôu ƀă tơbleăng