VOV4.Sêdang - Vâ  hbrâ mơhnhôk hiâm mơno mâu vâi o ki phô̆m vâ xông kân dế pơlât ƀă pêi pro tơdroăng ki klâ ối krê vâ hbrâ mơdât pơreăng COVID-19, hâi lơ 17/9, Hô̆i đong đô̆i kong pơlê Dak Lak ƀă Hngêi mơhno túa lĕm tro mâu phô̆m vâ xông kân kong pơlê tơrŭm ƀă tíu pêi cheăng tŏng kum tơkŭm po tơdroăng “Tơdroăng veăng tŏng kum on đĕng têk bâ eăng tơdroăng rơhêng vâ” Trung thu 2021.

Veăng tŏng kum tơmeăm khoăng ăm vâi hdrêng kơpong klâ ối krê, mơdât prôk lăm ƀă pơlât COVID-19 a Dak Lak 

Tiah mê, khu kố hiăng troh pôu ƀă diâp 200 hnoăng tơmeăm trung thu ăm mâu vâi o kŭn a 4 tíu mê cho: Hngêi pơkeăng lêng kơxô̆ 1 ƀă Kơpong klâ ối krê Hngêi trung Kao đăng Kong ngê̆ Tây Nguyên a pơlê kong kơdrâm Ƀuôn Ma Thuột; Kơpong klâ ối krê tơkŭm ƀă tơring ƀuôn Pưk Prông a cheăm Ea Ning, tơring Čư̆ Kuin; ƀă kơpong mơdât mot lo a cheăm Čư̆ Nĕ, tơring Krông Ƀuk. Rêm hnoăng tơmeăm tung mê ai kơ-ƀăn trung thu, têa tôu ro, on kơđĕng tơdrêng vâ mâu vâi o châ tơdah Têt Trung thu tung tơdroăng ki ai tŭm tơmeăm. Tâi tâng kơxô̆ liăn ‘no ăm tơdroăng kố ai 30 rơtuh.

Katarina Nga tơplôu ƀă tơbleăng