VOV4.Xơ Đăng - Vâ teăm tơdrêng mơhnhôk sinh viên hdroâng kuăn ngo rơkê tung hriâm tâp, kơxê lơ 12/11, Khu ngăn ‘na tơrŭm Droh rơtăm Việt Nam kong pơlê Dak Lak tơrŭm ƀă Khu sinh viên Việt Nam kong pơlê tơkŭm po tơdroăng trâm mâ, kheăn kơdeăn sinh viên hdroâng kuăn ngo roh má 23, hơnăm 2021. Xua tơdjâk dêi pơreăng COVID-19 xua mê tơdroăng châ tơkŭm po mơ’no tơdrêng tung um tơvi ƀă 15 tíu hrik hyôh um a mâu tơring, pơlê kong krâm ƀă pơlê kong kơdrâm tung kong pơlê.

65 ngế sinh viên hdroâng kuăn ngo kong pơlê Dak Lak châ hriâm rơkê hơnăm 2020 – 2021 châ kheăn kơdeăn

Kong pơlê Dak Lak nôkố ai dâng 9.800 ngế sinh viên dế hriâm a mâu hngêi trung cao đẳng, đăi hok tung lâp tơnêi têa; tung mê ai lối 2.000 ngế sinh viên hdroâng kuăn ngo. Tung kơxô̆ kố ai hên ngế ki rơkê hiăng châ hriâm rơkê, veăng hên tung mâu tơdroăng cheăng ƀă tơdroăng tơmiât troh ‘na pơlê pơla.

Akố, mâu sinh viên hiăng tơpui tơno, tối dêi ‘na tơdroăng hriâm tâp, mơ-eăm tơkâ hluâ pá puât ƀă tơdâng tơ’mô chô vâ veăng mâu tơdroăng ki pleăng hnoăng cheăng. Roh kố, khu tơkŭm po xuân kheăn kơdeăn 65 sinh viên hdroâng kuăn ngo kong pơlê Dak Lak châ hriâm rơkê hơnăm 2020 – 2021.

            A Sa Ly tơplôu ƀă tơbleăng