VOV4.Sêdang - Mơhé Viƀan kong pơlê Dak Lak hiăng pơkâ pro mơdon hâi khế hriâm troh hâi lơ 15/9, laga nôkố Dak Lak xuân ối trâm pá tơdroăng xing xoăng tê kơxop mơ-éa hriâm ăm hok tro. Xiâm kối cho xua kơxop mơ-éa hriâm ôh tá ối tung inâi tơmeăm ki kal xúa rêm hâi xua mê sap hâi lơ 26/8 troh nôkố, mâu tíu tê kơxop mơ-éa a mâu tơring dế pêi pro pơkâ 16 pơkâ klĭng péa pơ’lêh tê tiô troăng mơ’no tơdrêng tung um tiô troăng măng Internet.

Tiô pôa Trương Văn Băng, Kăn pơkuâ Kŏng ti tơlo liăn tê mơdró tơmeăm hriâm tâp hngêi trung Dak Lak, mâu hơnăm hdrối kŏng ti tê kơxop hlá mơ-éa hriâm, mơ-éa chêh, tơmeăm xúa tung hriâm tâp ing 7 hngêi tê kơxop mơ-éa ƀă lối 400 tíu tê tung lâp kong pơlê. Hơnăm kố, xua pơreăng COVID-19 xông tâ tú ó xua mê tơdroăng tê, pơto, djâ kơxop mơ-éa troh ƀă hok tro xuân trâm pá puât.

Sap ing hâi lơ 5/9, kŏng ti tê tơmeăm tung online tơdah kok rôe dêi kuăn pơlê ing Zalo, Facebook. Xua hơnăm apoăng pêi pro tê online xua mê kŏng ti xuân trâm hên pá puât tung mơ’no tê kơxop hlá mơ-éa troh kuăn pơlê. Pơreăng COVID-19 a Dak Lak tiô tối hdrối xuân ối xông tâ tú ó tung la ngiâ. Xua mê, tâng Viƀan kong pơlê ôh tá ai troăng tah lôi teăm tơdrêng mê tơdroăng hok tro ôh tá tŭm kơxop hlá mơ-éa hriâm tung hơnăm nếo xuân pơtối ối ai.

A Sa Ly tơplôu ƀă tơbleăng