VOV4.Xơ Đăng - Maluâ tro tơdjâk troh xua pơreăng kân COVID-19 la 11 khu tơdroăng cheăng kâ rêh ối pơlê pơla dêi kong pơlê Dak Nông pơrá pêi klêi ƀă tơkâ luâ túa pơkâ mơ’no. Tơdroăng kố châ tối a Rôh hôp mơgêi hnoăng cheăng hơnăm 2021, pơcháu túa pơkâ, mơ’no xêh liăn ƀă tơbleăng tơdroăng cheăng hơnăm 2022, xua Vi ƀan hnê ngăn kong pơlê tơkŭm po a kơxê lơ 16/12. Tiô tối tơbleăng dêi Vi ƀan hnê ngăn kong pơlê Dak Nông, tung hơnăm 2021, ki rơdêi ‘na mơdêk GDP dêi kong pơlê châ 8,63%, ối má 7/63 to kong pơlê, pơlê kong kân tung lâp tơnêi têa; pêi lo liăn rêm ngế châ 52,1 rơtuh liăn môi ngế tung môi hơnăm.

Tâi tâng a hneăng hôp

Nâp liăn Tơnêi têa châ lối 3.100 rơtal liăn, tơkâ luâ tơdroăng ki kong pơlê pơkâ nâp. Tâi tâng túa pơkâ ‘no liăn cheăng tơdjuôm hơnăm 2021 dêi kong pơlê vâ chê 2.117 rơtal liăn, kơxô̆ liăn ‘no ăm vâ chê 98% túa pơkâ ƀă hên tơdroăng ki ê. ‘Na túa pơkâ mơnhông mơdêk cheăng kâ rêh ối pơlê pơla hơnăm 2022, Dak Nông tiô tối hdrối kô rak vế kơlo tâk GDP châ 7,5%; nâp liăn châ lối 3 rơpâu rơtal liăn; kơxô̆ rơpŏng kơtiê dêi kong pơlê kơdroh a kơlo lối 3%, kơpong hdroâng kuăn ngo châ 5% tơngi klêng.

Katarina Nga tơplôu ƀă tơbleăng