VOV4.Sêdang - Kong pơlê Dak Nông hiăng ‘mâi rơnêu tơdroăng ki pro pơhôi klâ krê pơlê pơla a hên tơring, cheăm ‘na tơdroăng ki pêi pro pơkâ 19, hiăng vêh po tâi tâng mâu tơdroăng cheăng tê mơdró, a kong pơlê. Tiô hlá mơéa châ Vi ƀan hnê ngăn kong pơlê Dak Nông pơkâ a hâi lơ 23/9, pơlê kong kơdrâm Gia Nghĩa ƀă 5 tơring Tuy Đức, Dak Glong, Dak Song, Krông Nô, Čư̆ Jut hiăng hơ’lêh pêi pro ing tơdroăng pơkâ 15 chiâng tơdroăng pơkâ 19.

Krê tơring Dak Rlâp xuân ối pêi pro tơdroăng pơkâ 15 ƀă tơring Dak Mil pơtối pêi pro tơdroăng pơkâ 16. A mâu tơring, cheăm ki hiăng hơ’lêh pêi pro tơdroăng pơkâ 19, Vi ƀan hnê ngăn kong pơlê Dak Nông ăm phêp vêh po nếo mâu hngêi ăm tơmối ôu kâ, la thế pêi pro tiô mâu tơdroăng pơkâ hbrâ mơdât pơreăng COVID-19 tiô pơkâ dêi Khu xiâm ngăn pơkeăng ƀă khăm pơlât. Ki nhên pôi tá tơkŭm luâ 30 ngế a tíu ối tơdjuôm, a tíu pêi cheăng, hngêi pơkeăng, hngêi trung hriâm. Riân troh hâi lơ 23/9, kong pơlê Dak Nông ai 697 ngế tâ COVID-19, tung mê ai 253 ngế hiăng pơlât prêi.

Katarina Nga tơplôu ƀă tơbleăng